يهرب من مطاردة جيش الفئران

عشان إسم حبيبى ملازم إسمى …

و كلنا معاها

و البسكوتاية دى تبقى
ميومة البهية
كما احب أن أسميها
و
مى بهاء

كما يعرفها الجميع فى عالم التدوين بمدونتها

نص دستة افكار

النهاردة السبت سبعة فبراير كان حفل توقيع اول كتاب ليها

مناصفة مع الاديبة الموهوبة

مشيرة محمود

و اللى فى تجربة جديدة و غريبة حبتين

قرروا الإتنين بحكم الصداقة و المغامرة والتى أظنها محسوبة و ناجحة

فكان الكتاب و اللى عنوانه

ختم مغادرة

و أجمل ما فى الأمر إن التجانس ما بينهم كان شكله مقصود

فداه اللى خلى هذا الشعور ينتاب كل من يفر و يقرى فى الكتاب
يعنى اللى هيقراه غالباً هيحس إنه روح واحدة و إحساس واحد

و شجن ممكن

بتحطى كحل

عشان تكونى احلى

حبر القلم

شايفاه قصايد عالورق

الوحدة عندك

فرصة للخيال

و لا تقليب للمواجع ؟

الازمة بتقويكى

كادر الحياة مليان زوايا

و اللقطة تحت امرك

———

مش عارفة إتكلم عن إيه بالظبط لأن المشهد كان جميل فى كل الزوايا

نظرة عينين ميومة لما شافتنى و لأنها غالبا لم تتوقع حضورى

ومش عارفة ليه ؟… وكأنه كان ينفع أفوت اليوم دا

و مبقاش موجودة ؟!!

و الحضن الجميل الكبير اللى خدته منها و كمية التواضع الرهيب

مع إنها فى يوم يستوجب الفخر و الشديد كمان

- يا بنتى مقولتيش ليه من بدرى كان الواحد عمل بوست و عزم ناس كتير تيجى

- أصلى عاملة حاجة كدا على قدى و الحكاية مش جد قوى

قصدك قد الدنيا يعنى .. كدا تمشى و تبقى معقولة

ذكرياتك اللى بتاعتك أوى

و كل لحظة حنين بتجيلك

على بابها ترمى الحاضر

تجرى عالأوضة الى بتحبها

بعد ما عملت نفسك

مش واخد بالك

من شقوق الحيطان

و إنت خارج تتكعبل

و تكتشف ساعتها

إن كل اللى دخلوا الشقة معاك

معاهم نسخة من المفتاح

و إن مستحيل حد فيكو

يغير الكالون

و اللى نظرة الحب و إستقبالها ليك كفيل بإنه ينسيك

أى حاجة ممكن تكون وحشة فى الدنيا

والدة مي جت و عملت حالة كدا من الحنان غريبة و حميمية

و كمان جوزها و اولادها شاركوا فى الإحتفال بيها

وتيجى تقولها مبروك ترد عليك برد شديد الرقى لدرجة تخليك تتكسف من روحك

اللى مجاش النهاردة اكيد فاته ساعات من البهجة فى صحبة مى

لكن لو جاب الكتاب مش هيفوته عبيرها الذى لا يخفت

و يبقى فى القلب سعادة شخصية لأكتر من سبب

اولهم إن مصر بخير و المواهب تتدفق بس الدنيا تلاحق عليهم

تانيهم أن المواهب دى إنضمت إليهم و بجدارة و إستحقاق حبيبتى ميومة البهية

تالتهم لأنى قدرت آجى يوم مميز زى دا

جزء من ديكور حياتك

لو حتى شايف الامل

ورقة شجر ..

نشفت و طارت فى الهوا

هوه الخريف كل الفصول ؟

ألف مليون مبروك يا حبيبتى يا مى

———————————-