مش عارفة أقول حاجة
غير بس إنك
وحشت أحبابك جداً
ألف حمدلله ع السلامة
عندكو إستبن ؟!
21 نوفمبر 2008 أضف تعليق
سؤال مهم بجد عندك إستبن أو أحتياطى لمدونتك ؟
جايز أغلبنا يكون بحتفظ بنسخة من البوستات
لكن التعليقات ؟
بيعمل فيها إيه؟
و محمد مهندس مصرى لفت نظرنا لكثرة ضياع المدونات
و الأحوال الغريبة اللى بتحصل الأيام دى على البلوجر
هتلاقوا اجابة شافية على السؤال المحير فى البوست
نعمل إيه عشان يبقى الواحد عنده إستبن لمدونته
أنا شخصياً مش متخيلة لو جيت فى يوم أفتح مدونتى ألاقيها أختفت
و عشان اهيىء نفسى لكدا أخدت بالنصيحة
و عملت نسخة على الوردبرس
و عشان أنتو كمان تعملوا كدا هتلاقوا التفاصيل و بكل سلاسة
شارحها الأستاذ عصفور المدينة
و اللى من موقعى هذا بقوله
جزاك الله خيراً عنا
و أنت كمان يا مهندس مصرى
مشكريين يا هندزة
و إنتو بقى
يلا بقى مستنيين إيه؟
!!!!!!!!!!
مش هتجيبوا إستبن؟
ليييييه ؟
عشان هوه عندكو أصلاً
طييييييييب
دفتر الغياب
10 نوفمبر 2008 60 تعليق
تملى ف قلبى يا حبيبى
و أنا عايش غريب عنك
تملى و لا إنت دارى بى
و أنا بشكى إليك منك
محمد فوزى
طلعوا الكرسات 2
25 أكتوبر 2008 39 تعليق
آه فيها حاجة
طلعوا الكراسات تانى
هوه فيه حد كبير على العلام ؟!!
يلا كله يطلع الكراسة و القلم و الأستيكة و حسكوا عينكو أسمع نفس
كله وشه فى شاشته قصدى كراساته و يركز معايا كويس
ألا الدرس النوبة دى طويل حبتين و عايز صبر و تكونوا فطرتوا كويس
و اللى مفطرشى لسه يطلع الشندوتش ياكله عشان يصحصح معايا
اللى قاعد جنب الشباك يقفلوا عشان متسرحوش
محدش يرغى مع اللى جنبه و لا يبص فى ورق اللى جنبه
و متخلونيش ابعت حد يجيب عصايا من الفصل اللى جنبينا
خلاص كله سكت
نبتدى عل البركة
درس النهاردة يا شطار عن كيف تضع موسيقى فى مدونتك
و بالبلدى كدا حططان مزيكا فى البلوج بتاعك
عارفة
هتقولولى إحنا خدنا الدرس دا قبل كدا يا ميس
هقولكم عارفة يا ولاد بس أصل الدرس بتاع النوبة اللى فاتت قدم خلاص
و كل ما آجى أدخل على الموقع بتاع
ITOKY
ميشتغلش
فروحت مدورة على حاجة تانية
و طالما ربنا فتحها عليا و عرفت حاجة يبقى لازمن أشارككم فيها تدوينياً
عشان أنا معنديش اغلى منكم
المرة دى هنحتاج ندخل موقعين مش موقع واحد
موقع لتحميل الأغانى و تشغيلها عليه
و موقع تانى بنحط فيه الغنوة المتحملة على جهاز كاسيت
الموقعين لازم نكون متسجلين فيهم يعنى ندخل على ال
REGISTER
و نسجل بياناتنا و الأيميل و الباس ورد و كدا لحد ما نبقى
MEMBER
أو عضو فى الموقع و لينا صفحة خاصة بينا
الموقعين كالتالى
الأول
و الموقع التانى
———————
الأول هنبتدى بالموقع الاولانى اللى هنسجل عليه الأغانى بتاعتنا اللى هوه ال
HOTLINKFILES
بعد ما تدخل و تسجل نفسك هتلاقى شريط رمادى
فى الصفحة فوق مكتوب فى تالت خانة فيه
UPLOAD
ندوس عليها
هيفتح صفحة جديدة فيها مستطيل فاضى و مكتوب تحته كلمة
UPLOAD
ندوس على الكلمة اللى جنب المستطيل الفاضى
BROWSE
هيفتحلنا شاشة على الديسك توب بتاع الكمبيوتر بتاعنا
المطلوب منك تختار أى غنوة أنت عايزها و تدوس عليها
خلى بالك الغنوة لازم تكون
MP3
هتلاقى الموقع دخل صفحة جديدة فيها مستطيل رمادى
فوقه كلمة
UPLOAD IN PROGRESS
وهتلاقى المستطيل الرمادى شوية بشوية بيزرق
و دا معناه إن الغنوة بتتحمل بنجاح
بعد ما تخلص الغنوة من التحميل الموقع هيدخلك على صفحة جديدة
و مكتوب فيها
LINKING CODES
سيب كل اللى مكتوب باللبنى دا و طنشه فيما عدا المكتوب
JUST THE DIRECT URLS
دوس عليه
هتلاقى لينك مكتوب بحروف صغيورة فى مستطيل ابيض كبير
تاخد ال
URLS
و تحتفظ بيه دلوقتى
————————-
و ندخل على الموقع التانى بتاع البلاى ليست
اللى هوه
بعد ما تسجل نفسك و يبقالك بروفايل او صفحة خاصة بيك و الموقع يقولك هاى
بص فى أعلى الصفحة هتلاقى كام كلمة فى مستطيلات صغيرة ملونة
دوس على الالمستطيل الأحمر الأولانى و مكتوب عليه
MP3 PLAYLIST
هتدخل على صفحة مليانة بلاى ليستات او اجهزة كاسيت يعنى
أشكال و ألوان
نقى اللى يعجبك و ليكن الدبدوب مثلا
دوس على
CREATE NOW
هتتلاقى صفحة مكتوب فيها
CUSTOMIZE YOUR MP3 PLAYLIST
هتلاقى تحت الجملة دى شكل الدبدوب اللى إخترته
تحت على الشمال مربعات ألوان كتير
تختار الألوان اللى تعجبك و تليق مع لون مدونتك
و ممكن كمان تغير الشكل من دبدوب لأى شكل تانى
يعنى عيش حياتك بقى مع الاختيارات
دا الشمال اما ناحية اليمين
فهتلاقى الجدول اللى مفروض تحط فيه عنوان غنوتك
فاكرين ال
URLS
او عنوان الغنوة اللى خدناه من الموقع الاولانى و شلناه على جنب ؟؟؟
أيوووووووووه دا بعينه
تروح دايس على كلمة
UPLOAD
المكتوبة بالأزرق هيتفتحلك جدول
تروح كاتب الURLS بتاعة غنوتك فى الخانة المكتوب فوقيها
MP3 URLS
حط غنوة او غنوتين زى مانت عايز
و بعدين تدوس على المستطيل البرتقالى المكتوب عليه
ADD MP3S
هتروح داخل صفحة جديدة مكتوبالك فيها تحت الشكل اللى إخترته إن الغنوة
SONG ADDED
تنزل تحت فى آخر الصفحة على المستطيل الأخضر
هتلاقى جنبه خانة فاضية أكتب فيها أى كلام …تسمية يعنى للكاسيت بتاعك
و ليكن أسم المطرب او الغنوة
و بعدين دوس على المستطيل الأخضر المكتوب عليه
SAVE GET CODE
هيدخلك فى صفحة متكوب فيا
لينك أزرق طويل
دوس عليه
كدا تبقى وصلت لآخر صفحة خلاص هتلاقى فيها الكود جنب كلمة
COPY
خد منه نسخة و أفتح صفحة تخطيط المدونة بتاعتك على
عناصر الصفحة
أفتح
أضافة أدة
من الجدول إختار
HTML/JAVASCRIPT
حط فيه الكود اللى خدنا منه
COPY
فى آخر خطوة و دوس
حفظ كالعادة زى ما بنعمل فى أى حاجة نضيفها على مدوناتنا
و روح أفتح مدونتك و إن شاء الله تلاقى البلاليست آخر تمام
إيييييييييييييه؟؟!!
خلصنا خلاص و الجرس هيضرب كمان دقيقتين
اللى نايم يقوم يروح الحمام يغسل وشه
و اللى لسه صاحى يا رب يكون فهم حاجة
اللى حاول مرة و معرفش مش عايزه ييأس من رحمة ربنا
و يحاول تانى
و اللى عاوز يسأل برضو أنا تحت أمره أتوهه كمان و كمان
مع إن الوصفة سهلة
الوصفة هايلة
مش كده؟؟
طب مع السلامة و اختم بطريقة آبى قمر التدوين كلاته
كان معكم للمرة التالية و بنجاح منقطع الجماهير
مدرس اول رياضيات تفاضل و تكامل حساب مثلثات حاسب
فاتيما أم يوسف أفندى رفعنا العلم
من جاءته النعمة
و لم يشكر
رحلت عنه … و لم يشعر
حكمة عجبتنى قوى
ورقتى لم تسقط بعد
19 أكتوبر 2008 77 تعليق
in التدوين و أهله, بعض من هذيانى
وحشتونى قوى
قوى
كل ما أحاول اكتب حاجة
ألاقى الكلام رايح ناحية شجن و داخل على كآبة
أقوم أتراجع و أقول أستنى المووود يتعدل
عاوزة اطمنكم على أحوالى و احوال يوسف
بس مش لاقية كلام كويس أقوله غير كلمتين بس
ومتهيألى مفيش أحسن منهم
الحمدلله
التدوين وحشنى و أهله اكتر بكتير
أخباركم ف مجملها جميل و مفرح … فيما عدا بعض الأحزان
علها تنقشع قريباً من فوق سمائى
و سماء احبائى كلهم كمان
وحشتووووووووونى قوى
الشيكا بيكا تبقى دى إيه هيا
هيا الحركات اللى مش هيا
الفرقة
و الحرقة
و الغرقة
و الزومبة ف البومبة الذرية
فبدال ما نطق يا ولا نضحك !!!
العبقرى ص .ص .ج
“صلاح جاهين “
عزاء واجب
15 سبتمبر 2008 أضف تعليق
عزاء واجب للغاليةهذا الملاك الجميل
من فترة بسيطة كتبت بوست عن
و رفعنا لها و لهذا الحبيب أسمى آيات الإحترام
لأنه لم يكن مجرد شخص و يعبر فى الحياة كغيره
كان عند إيمان الحبيب الدائم الذى لا يخبو وهج قلبه أبد مهما يكن
بعد وقت قصير فوجئنا بها تكتب فى آخر تدوينة لها بعنوان
تدعو فيها لوالدها و تطلب منا الدعاء له
من ساعات فقط علمت من صديقة مشتركة بيننا
إن والد إيمان إنتقل بجوار ربه بعد معاناة لأيام و أسابيع فى سرير المستشفى
و أردا الله أن يكون الرحيل فى هذه الأيام
و فى هذا الشهرالكريم
البقاء لله يا إيمان
و لو إنى لا أدرى إذا ما كان هناك فى هذا العالم أى كلمات
أقولها و يمكنه أن تخفف عنك
فقدان أغلى أحبائك
لكنى سأدعو الله أن يخفف من احماله
و يجعل مثواه الجنة و لا غيرها مثوى
و ربنا يبارك فى عمر الوالدة و يخليهالكم
إنتى طول عمرك الكبيرة و الأثيرة و أميرة أيامه
و أظنه كان يعدك لحمل المهمة النفسية دى بالنيابة عنه
مهمة أن تكونى الحضن الذى يضم كل العائلة و يكون سندها و أمانها
و ها قد حان الوقت لحمل الرسالة دى
و إنتى قدها جداً
لأنك بنت أبيها
و قد أتم مهمته كأب على اكمل وجه ممكن
و يكفى معرفتك و لو لدقائق حتى ندرك إن هذه الإنسانة بنت ناس
طيبين قوى و محترمين قوى و معطائين لآخر مدى
لا أعرف هل دعائى يستجاب ام لا ؟
لكنى سأدعو الله كى تهدأ روحك
و يغفر الله لوالدك الغالى
و حبيبك الدئم مهما حدث
البقاء لله يا حبيبتى
على صدرى شبك إيدك
قلبى الضعيف بردان
ليه سبتنى وحدى
قبل الأوان بأوان
واحد إتنين تلاتة
22 أوت 2008 93 تعليق
Glitter Graphics – GlitterLive.com
واحد
يوسف كان عيد ميلاده يوم الخميس 21 أغسطس
تم ال 9 سنين و بقى راجل اكتر من الاول
كل سنة و روح قلبى بخير
و السنة الجاية ربنا يكرمنى و أعمله عيد ميلاد وسطيكم
و شكر لكل اللى عايدنى من بدرى بدرى وشكر خاص للعزيز
mohmmed
اللى عامل بوست مخصوص ليوسف غمرنى فيه بذوقه
بشكرك بجد
إتنين
النهاردة كان يوم حلو قوى رغم إنى مقعدتش كتير
بس فخورة إنى شاركت و لو بالحضور فى بؤجة الخير و أكون وسط الصحبة الحلوة دى
و عارفة إنى عملت قلق لناس كتير بعتذرلهم
و بقولهم متقلقوش أنا كويسة أهو
و محصلش حاجة مرعبة يعنى و ربنا يسهل و الحاجة تهدى
و على سبيل التهدئة هلم التعابين شوية و مش جاية للأسف ساقية الصاوى بكرة
بس معتمدة عليكم بقى تسلموا على كل اللى جاى و تنقلوا الحدث بذمة
و محدش يكروت
عشان أعرف كل الأخبار
لو نفع آجى هاجى إنتم عارفين يعنى
بس لو مقدرتش تعرفوا إنى كنت أتمنى آجى بس الظروف
تلاتة
أنا مقعدتش كتير و فلسعت بدرى بدرى عشان كدا هسيب التفاصيل لحد تانى حضر اليوم من أوله لآخره
يبقى يقول عملوا إيه بالملى بس هبعت رسايل سريعة للى حضروا النهاردة
و ملحقتش أقولهم يعنى
يا دوللى يا قوس قزح متقلقيش يا حبيبتى و ميرسى على كل الحب و حنية القلب
و على الفكرة الجميلة و إنك جمعتينا معاكى على الخير دا
يا خيخة أسفة مقدرتش أقعد معاكى كان نفسى أفضفض معاكى بس ملحوقة
يا خالووود جدع من يومك و مش عارفة أقول إيه تانى غير يا لهوووووى
شيماء فضفضة يا حبيبتى إنتى كل مرة بتغمرينى بكرم اخلاقك يا مشمشة
يا بابا أبو خالد أسفة لأنى مشيت قبل ما أعرف حضرتك كنت عاوز تقولى إيه بس نورت
يا أحمد كمال إنت عيونك النهاردة كانت معبرة قوى و كلها فرحة و حاجات مش عارفة أختصرها فى جملة
غير إنه خير وسلام و رضا
كعادتك يا سوووو قلبك دا حنية الدنيا فيه و لازم تفتكر و تقولى كل سنة و جو طيب
يا إيناس إنتى و نسمة نورتو المطرح بوجودكم و قويتوا قلوبنا
و كدا يا سكر تيجى و أنا ماشية و ملحتقش أبوس القمر اللى معاك ؟!ّ!
يا ميرا إنتى إنسانة لطيفة و تتحبى من أول ثانية بجد
و آبى إنتى بقى مش منتظرة منى كلمة لأن مفيش كلام يوفيكى حقك من الجدعنة
يا سوما عايزة أشكرك قوى على الجدعنة الكتييييرة معايا و إبتسامتك الجميلة
يا جنة إنتى شخصية خلوقة قوى و محترمة و إتشرفت بيكى
و يا إيما وجودك النهاردة كان مصدر سعادة كبيرة قوى ليا و جوزك شخصية محترمة جداً
و فكره مميز و لازم ينقل الفكر دا فى مدونة و عاوزة أقول إنى لما خدت رامز فى حضنى
النهاردة حسيت إنى بحضن يوسف بجد
و حسيت إنى أم للحظات و ربنا يخليلك فريق الزعر و كان نفسى أشوف عاصم و زياد قوى قوى
يا عسقول إنت دايما متجمع فى الخير و معاك شطرك الآخر الباحث عن الحقيقة الاخلاق
مها زين يا ميهو إنتى يا بنت جميلة جميلة جميلة
و شكر كبير ل حنين القلب حبيبتى اللى كلمتنى تسلم عليا و كان نفسى تكون معانا
و طبعاً الخال احمد الصباغ الراجل اللى مفيش حدث تدوينى يبقاله طعم من غيره
فيه ناس حلوة جت برضو زى كريم يوميات مطلق
و شخصية محترمة جداً إتشرفت بيه قوى اللى هوه الأستاذ شريف
و أكيد ناس تانية كتير بس أنا مش فاكرة دلوقتى و يا ريت يعذورونى
الناس اللى جت بعد أنا ما مشيت بشكرهم على وجودهم و مشاركتهم
و دايما يا عيال كدا متجمعين فى الخير
و لو فيه شكر بيتقسم بالعدل
يبقى الشكر الكبير يبقى من نصيب أصحاب الفكرة
داليا قوس قزح و آبى أحلى كوكب
ربنا يكتر أفكارنا الحلوة و يجمعنا فى الخير دايماً
يا رب
المهم إنى روحت ….
19 أوت 2008 94 تعليق
آه روحت
و محدش يسألنى إزاى عشان دى كانت معجزة
مناقشة حامية كادت تتطور مع الست الوالدة ع الساعة 7 الصبح
و بغض النظر عن سيرالنقاش و درجة حدته
المهم النتيجة النهائية
إنى كلمت خالد همس الاحباب و قولت
أنا جاااااااى فرافيروووووو
بعد ساعات كنت فى موقف السوبر جيت و بركب لمحطة الرمل
و بدور على مكان التجمع
اللى كان فى كافيه هادى و شيك جنب سينما امير فى محطة الرمل
طبعاً خالد خرج يجبنى لحسن أتوه
و بعد حوالى عشرتشر مكالمة موبايل طول سكة السفر
– إنتى فين دلوقتى
– عديتى البوابات و لا لسه
– رنيلى أول ما توصلى محطة الرمل
– وصلتى الحمدلله
– طب بقولك خليكى مكانك و أنا هجيلك أخدك
يا لهوووووووى
الواد دا أخويا بجد مش بهزار ….
بتكلم جد
دخلنا الكافيه لقيت الصحبة الجميلة
لقيت من مدونى إسكندرية
بنوتى الحلوة لماضة
و كان نفسى أجيبلها الفانوس بس معلش عشان
أنا أصلاً جيت من حيث لا أعلم
و ملحقتش احضر حاجة و أجيبها معايا و السنة الجاية ليكى فانوسين يا مرمر
و أكيد اللى كان نفسى قوى قوى أشوفها
و اللى يا جماعة إنسانة لطيفة و جميلة قوى
و تحس بحنان كبير فى عيونها و كم حب يكفى الكون كله مش بس إسكندرية
و عاوزة اشكرك على كل اللى قولتيه و حسيته فى عينيكى كمان
و يا ريت أكون قده و أستاهله
و كمان كان موجود
و الحقيقة هوه شخصية محترمة جداً و متزن و باين عليه دماغ كبيرة
و الاهم من كل شىء عاشق إسكندرية
و حامل جنسيتها المشرفة لكل حد من البلد الجميلة دى
و كمان جت زمردة و للأسف ملحتقش أقعد معاها لأنها جت متاخرة
كنت أنا بودعهم بس باين عليها شخصية لطيفة جدا
و كنت منتظرة أشوف بنت القمر
و سألت عليها لماضة قاللتلى إنها إتكلمت و سألت عليكى
و هتتكلم تانى و فعلاً إتكلمت و إتفقت أشوفها يوم حفل العدد التانى
من مدونات مصرية للجيب
يوم السبت إن شاء الله إذا أنا عرفت آجى
و شاب مهذب إسمه رومانسى
و كان ساكت اغلب الوقت بس أخد أسماء مدوناتنا عشان نتواصل
و إتمنى يدخل عندى عشان أقدر انا كمان أدخل مدونته و نتعرف أكتر
دول كانوا مدونى إسكندرية اللى حضروا
إما فريق القاهرة فكان كالآتى
و كان مصدع و ساكت كدا زى ما يكون حاجة معكنناه و يابنى قول إتكلم مفيش فايدة
و عاوزة أشكره على الجدعنة و الشياكة بتاعته معايا
من بورسعيد الجميلة جه بابا أبو خالد
و اللى كعادتنا كنا مبسوطين بوجوده معانا و وسطنا و إتمنى ميكونش زعلان منى
لأنى أصريت إلحاحاً إنى أروح بدرى عنهم و ملحقش الغدا اللى كانوا مرتبينه
بس يعنى يا بابا إنت عارف الظروف و حقك عليا
جه عم الشباب و الرياضة العجوز اللى عدى ال 30 و الملقب ب
أرجل رجال المحروسة بعد واقعة التين الشوكى الشهيرة
و كان هوه فاكهة القعدة بصراحة و بخفة دمه المعهودة عمل جو و مذاق للحديث
و طبعاً مش هقعد أشكر بقى يا سوووو على الجدعنة و و الذوق
و كفاية بقى لحسن تتمرع
ميييين كمان ؟؟
و البت دى بصراحة مفأجاة ليا … يعنى أنا قريتلها بوستات كتير فى مدونتها
و تخيلتها بشكل مختلف بس طلعت احلى بكتير و دمها خفيف موووووووت
و عرفت منها معلومة مكنتش عارفها قبل كدا
و هيا إن اللى بنى مصر كان فى الأصل حيلوانى مش حلوانى
يعنى اللى بناها من حلوان مسقط رأس مها زين و محدش يعك بعد كدا
و يقول معلومات غلط و يكسفنا
أنا بقولكم أهو
كان جاى مع مها صديقتين ليها لطاف جدا و إستمتعت بالدردشة معاهم لوقت قصير
نيجى بقى للزغاليل الكبيرة بقى
طيورى التلاتة الحلوين
شيماء سمير و مصطفى ساجى و بطوط حبوب
مش هتكلم بقى … حبيبة قلبى العصفورة الصغيورة و الشاعرة الكبيرة
و الفنانة الموهوبة و …و …
هيا أصلاً كانت فى مصيفها مع العايلة و بناء على طلب من بابا أبو خالد جت و نورتنا
و ألقت علينا بعض من قصايد ديوانها الرائع “” أطياف الصمت و خلقت حالة كدا
من الدسم الروحانى للقعدة و ناس كتير أشادت بأشعارها و دا الطبيعى يعنى و المتوقع
و مبسوطة قوى يا مشموشة إنك جيتى و شوفتك فى سما تانية غير سمانا الأولى …
الزغلولين الكبار بقى
اللى هوه اول واحد يكتب تعليق فى مدونة روح قلب ماما و صديق يوسف الصدوق
و ساعات كتير أضبطه داخل مدونة يوسف يبعبع معاه
بكلام رجالة سوا كدا على جنب
يا مصطفى يا روح شفافة إنت إنسان لطيف و مهذب و شكلك رومانسى بشكل خيالى
اومال يا واد الأربى جه اللى بتفتحه على الآخر ساعات دا جايبه منين ؟؟
من حبك و خوفك عليا …عارفة
أنا فرحانة بيك قوى و الله و المرة الجاية نقعد على رواقة ننم أكتر …
نيجى بقى الدكتور الكبير بقى اللى فاضحنا بعد صلاة الفجر
و هوه مش عارف يفوق المغمن عليه
اخويا و صديقى العزيز محمود اللى هوه
و اللى وشه كله سماحة و دمه خفيف جدا ً و متعرفشى كدا الإفترا بيطلع ساعات
و يقعد يلوح فى وشنا بالجنسية المنوفيه ليه و إحنا غلابة
و مفتحناش بوقنا يعنى و لا إعترضنا
و يا بطوط أنا فخورة بيك إنت و مصطفى و فخورة بمعرفتكم و بمودتكم ….
حد تانى جه و أنا ناسية ؟؟
طب على رأى الست ام كلثوم
فكرونى
طب لحد ما تفكرونى أرد على السؤال المهم
إتكلمتوا فى إيه يا مدونين ؟؟
أفتن بقى !!
طييييييب
البت لماضة الطعامة طرحت للنقاش موضوع الملكية الفكرية
و إزاى نحافظ على حقوقنا
و بوستاتنا من السرقة و الحل تأرجح بين تسجيل الموضوعات
او ترك الموقف معلق كما هوه لأن اللى عاوز يسرف هيسرق برضو و لو من كتاب
بس هيغير الإسلوب بس
تم تذكير الجميع بحفل العدد التانى من مدونات مصرية للجيب اللى هيبقى فى
ساقية الصاوى
يوم السبت الجاى دا طوالى
و الكل كان متحمس للحضور و ربنا يسهل
و عددنا يزيد ربنا فيه و يبارك
جبنا سيرة الأحباب اللى غايبين عن مدوناتنا بقالهم مدة زى
خالتى فرنسا هانم قمر السويس كله
كعادة سوووو مقدرش يقاوم الموهبة الكامنة و ميتكلمش عن السينما و التأليف
و الأفلام بتاعة الأيام دى
و كمان دار نقاش حوالين البوست بتاعه و الجدعنة الكبيرة اللى حصلت
و كان فيه تركيز رهيب على دور التين الشوكى و إثره فى تحول منعطف القصة
لتنتهى بإنقاذ البونية من الخطف
مها زين طلع عندها مواهب و كانت بتغنى و مش عارفة ليه بطلت بس واضح إنها شعلة نشاط
و كانت بتفكر الكل و تشجعهم على المشاركة فى بؤجة الخير
رومانسى كان ساكت و زى ما يكون بيستكشفنا الاول قبل ما يقول اى حاجة
و شكله خجول قوى
شيماااااااء …مفيش داعى أتكلم بس يشرفنى إنك بتعتبرينى حد مهم و بتحكيله
على حاجات قيمة و خطيرة كدا …. من غير ما أقول …. بحبك
مصطفى ساجى راسى كدا و مبتسم إبتسامة كلها براءة رهيبة
و حسيت كأنه إبنى مش اخويا الصغير بس
بطوط حبوب شخصية مرحة و لما تشوفه يدخل قلبك من اول دقيقة
من غير ما تفكر حتى تحبه و لا تستنى شوية
فرحت لما سمعت صوت أمانى بنت القمر و حسيت بإهتمامها إنها تكلمنى
و تسلم عليا
و ربنا يطمنا على أخوها العزيز و عليها هيا كمان
الكوم الكبير بقى … حنين القلب
حبيبتى اللى كانت من الأسباب الرئيسية
فى مجييى إسكندرية عشان أشوفها مخصوص عن قرب
و الحقيقة إنها اجمل و ألطف من أى تصور كان فى خيالى و قعدت مسكت ودنها
رغى رغى
لما دوشتها بس كنت سعيدة قوى بالكلام معاكى يا حنونة
و كأنى أعرفك من زمن طويل
فيه مدونة و مدونة جم و أنا بسلم عشان أمشى و للأسف ملحقتش أحفظ الأسامى
و ميزعلوش منى بقى بس شكلهم محترم و خسارة إن مجتش فرصة كافية للقعاد
و ربنا يسهل المرة الجاية
طبعاً الساعة بقت خمسة و لازم أروح عشان إنتم عارفين
مقدرش أتأخر عن تسعة او عشرة لما يحصل إيه
زائد التوتر اللى شغال عندى الأيام دى
قولتلهم إدلوقونى فى أى ميكروباظ عشان يوصلنى بأقصى سرعة ممكنة
خالد و سكر كتر خيرهم وصلونى لحد الميكروباظ و ركبونى
و خالد جابلى شطنة مليانة شيبسى و حلويات و بيبسى دايت
يعنى مدلعنى دلع مفيش بعد كدا
دا غير طول السكة موبايلات شغالة
– إنتى كويسة
– كله تمام
– لما توصلى مصر رنلى
يا لهوووووووووووى
و مفيش مرة يسيبنى اعمل مكالمة و بيقفل و هوه الى بيكلمنى
يا خالد إنا خجلانة من كرم أخلاقك و الله و مش لاقيه كلام يوفيك حقك
طبعاً عقبال ما وصلت مصر كانت صديقتى داليا بتكلمنى قبل ما أوصل للتحرير
– فاطمة المواصلات عاملة معاكى إيه ؟؟
– عادى يا داليا زحمة شوية بس
– عديتى جنب الحريقة ؟؟
– حريقة إيه ؟؟
– مش مجلس الشورى بيتحرق !!!
– بتهرجى
بضرب بعينى يمين لقيت ألسنة لهب جاية من اول شارع القصر العينى من ناحية التحرير
– يا ستار يا رب
دنا اللى بقول
و قفلت معاها و أنا بقول يا رب ما يكون فيه ناس جواه و جرالهم حاجة
كدا
كدا اغيب عن البلد يوم واحد أرجع ألاقى حريقة شغالة
دا مكنش يوم دا اللى غيبته
هتسألونى لما رجعتى مامتك عملت معاكى إيه ؟؟
و لا حاجة أنا داخلة بيتنا 9 إلا خمس دقايق يعنى تمام كدا
و داخلة مبتهجة بقى و فرحانة من الرحلة السريعة دى
و الناس الحلوة اللى قابلتها و لو إن الوقت مكفاش بس أحسن من مفيش
و كان نفسى أشوف كل مدونى إسكندرية الجميلة زى مجداوية و وليد صباح الخير يا مصر
و طيورها المهاجرة برا الحدود زى نسرين بسيونى و هنووودة
و كنت أتمنى كل احبابى اللى من القاهرة و بورسعيد و المحلة و إسماعيلية
و الدقهلية و كل المدونين و المدونات اللى برا الحدود المصرية ييجوا
بس معلش تتعوض وربنا يسعد أيامنا
و نتجمع دايما فى الخير
راجعة البيت و عاوزة ألم التعابين مع ماما
– ماما … ماما ( ببراءة)
– ………..
– مش فيه حريقة رهيبة… تعالى نبص من البلكونة (إستعباط تام )
– ………….( صمت رهيبى)
– دى حريقة كبيرة قوووووى تعالى بصى
– ……..عارفة …… (تطنيش )
– طييييييب أبص أنا
لسه مخاصمنى بس ربنا يكرم
و بكرة تروق
المهم إنى روحت
و خلاص
يـا عصفورة يا صغيورة
03 أوت 2008 29 تعليق
أراك كل يوم …آتياً بتلك الحقيبة
تجلس على المقهى …
يلتف حولك اطفال …
لا يتجاوز طولهم
ثلاثة أشبار من يدى الصغيرة …
ثم ينفضون …
مهللين … فرحين
و كأنه إنتصار الحياة على الموت !
تخرج بعض المأكولات
و تأكل …
يتبقى فتات الطعام
و ترحل
يأتى عصفور
يأكل … يأكل
و كأنه ينتظرك مثلى !!
… مرت الأيام …
مات العصفور جوعاً …
و مات قلبى إشتياقاً …
—————
بهذه الكلمات العذبة تشدو عصفورة قلبى شيماء سمير
فى ديوانها الاول و إبنها البكرى
بس ممكن أعرف أقول اللى ف قلبى
شيماء او مشموشة زى ما بحب أناديها دايماً
عرفتها بنوتة فنانة
و ليها مدونة إسمها إحتـــــــــمــــــــال
بندخل عند بعض و نعلق
و فى يوم لقاء المدونات النساء فقط إتقابلنا
و لقيت قصادى فنانة شفافة رقيقة
و نظرات عيونها غرقانة حب و إحترام لشخصى الضعيف
حسيت إن البت دى واخدة فيا قلم جامد
و بعدين قولت لنفسى الواحد لما بيحب
بيحب بقلبه قبل أى حاجة تانية
و هيا أكيد قلبها دهب
وقد كان …
أغلى من الدهب بكتير
فاكرة و أنا بودعها على باب النادى قبل المرواح
نظرات عيونها الحنونة و هيا بتقولى
إدعيلى
قريب هيخرج اول ديوان ليا و مرعوبة موووت
حسيت كدا إنى قصاد حد مش عادى
الفن و الشعر و مفردات كتير قلما تتجمع فى إنسان
لما دعتنى لحفل التوقيع كنت مبسوطة قوى
و حاسة إنى للدرجة دى مهمة و فارقة معاها
مع إنى معملتش أى حاجة ممكن أساعدها بيها
لكن قلبى كان بيرقص جوا ضلوعى
و هيا واقفة قصاد الميكرفون فى قاعة الإحتفال
و بتشكرنى أنا و هدى رينبو و بابا أبو خالد و خالد همس الاحباب
على حضورنا
و كأننا كان ممكن مثلاً منجيش !!!
و نفوت المناسبة دى ؟؟!!
مش عارفة أقول إيه على الحفل دا
بس مهما وصفت ليكم مش هتتصورا حالة السكينة و الوداعة اللى لفت المكان كله
حوالينا حضور كبير من الناس
لدرجة إن الناشر جاله حالة إذبهلال
و كأنه مكنش عارف غلاوة شيماء عن احبابها عاملة إزاى!!!
بس كان فيه كم إعتذرات زى شيماء ما قالت
لدرجة إنها قالتله اللى جاى بابا و ماما و اخويا و أنا الرابعة !!!
بس العدد ما شاء الله كان مالى القاعة
و جابوا كراسى من برا للوافدين بمرور الوقت
أما عن شيماء …..
أقول إيه ؟؟
عصفووووورة صغيورررررة
رقيقة عمالة تطير من غصن لغصن
يبترحب بالكل بإبتسامة و ضحكة عيون يخربيت كدا
الله اكبر يا حبيبتى من كل عين شافتك
و لما
ولا لما شافت بابا أبو خالد بقيت حاسة إنها هتفرد الجناحات
و تطير من الفرحة
و كل ضيف جايلها تحسسه إنه الأوحد
و إنه على الراس من فوق
لما إبتدت وقائع حفل التوقيع
فوجئت بشيماء جديدة مكنتش شوفتها قبل كدا
صحيح عارفة القلب الكبير الشفاف
لكن كم الأحاسيس و المشاعر و
اللى سمعتها من خلال أشعارها
كانت اكبر مفاجأة
و اجمل مفاجأة
العصفورة الصغيورة المشموشة يطلع منها كل دا ؟؟!!
و تستبق سنها بمشاعر
لا تاتى إلا لمن أختبر من العمر تجارب و حيوات
طبعاً مش هعرف إتكلم عن الديوان كناقدة لكن هتكلم كمتذوقة
أو على الأقل بحب الشعر
فطعم قصايد ديوان شيماء بطعم الحلو و المرارة
الشجن الجميل
و النبيل
تختصر كل مشاعرى فى سطور قليلة
————–
يأتى الليل بسرواله الأبيض اللون
ربما فى أحلام الغربان …
و يكسو الكون بشوق المحبين
يتصارع فى ظل و نور
نتخاصم للعرافين حالنا
و نوصد الأبواب على ليل ثقيل …أنهكنا
من فتى عاشق …
الى كهل ضائع …
فروح واحدة نحيا بها ؟؟
أنثرها فى ثرى الأحزان لنحيا بقايا عمر …؟؟؟
فلتفجر ….فلتضرب بكفيك أساطير البهتان
فلتدمر حوائط النسيان
فلتوقف كيد الشيطان
لا تمت فى ظل شجرة يقتنصها الغائرون
فلتمت فى ظل نفسك
تعش أبد ما مت …
—————
الجزء دا من القصيدة سمعته فى الحفلة تنحت لروحى قوى
و لما قريتها تانى تعبت قوى
و إرتحت
حسيت إنى مش لوحدى اللى كدا
و أتصور فى رأيى المتواضع
إن شمياء شاعرة هايلة و حقيقة بجد
الشعر لو مكنش بيقولك … ميبقاش حلو
لو مبيعبرش عنك …. ميبقاش صدق
الله عليكى يا شيماء
أنا المفروض إتكلم عن حاجات كتير حلوة مصاحبة ليوم الإحتفال
مولودك الجميل ” أطياف الصمت “
زى الوجه الجميل الصبوح اللى شوفته فيكى
و إنتى بتمثلى نموذج لكل بنات جيلك من الشابات
اللى فى بداية العمر و النضج تاج منور مفارقهم
و مش هتكلم عن كل تحياتك لأهلك
و إعترافك بفضلهم و مساندتهم ليكى طول العمر
و لا شكرك العميق
لمدرس اللغة العربية بتاعك و إثره فى تكوينك الأدبى و النفسى
و لا شكرك لكل الناس
و الحب اللى نشرتيه زى أشعة الشمس من غير حدود
الى كل الحاضرين و غير الحاضرين كمان
و لا عن سعادتى العارمة
بإهدائك الجميل فى نسختى الخاصة و اللى كتبتيه ليوسف
و لا عن قعادى
وسط أبويا الغالى أبو خالد و أخويا المجدع خالد همس الأحباب
و لا بقى هتكلم عن قصة لقائى
بشقيقة روحى هدى رينبو
اللى عاوزلها بوست لوحدها احبها فيه
بس أنا بعد إذنها هتكلم بلسانها و لسانى
و نستعير قصيدة ليكى
متهيألى هنحب نقولها أنا و هدى
للغائب عنا فى مدار بعيد و ربما نلتقيه يوماً
أو حتى لا نلتقيه
————-
هل لك إن تحملنى
بأنامل طفل يحمل قطعة شيكولاتة …؟!
أو لمسة حانية
من أنثى على زهرة حبيبها ؟!!
هل لك أن تحملنى بكل رفق
فإنى سريعة التهشم …؟!!
————
مشموشة يا حبيبتى
ب ح ب ك
قوى
قوى
—————-
تدوينات متعلقة بالحفل الجميل
شيماء سمير إحتمال شكر خاص للمدونين
بابا أبو خالد ذكريات خسر كثيراً
هدى عبدالقادر رينبو وقائع تحليق الفراشة بالقرب من الديوان
زى ما بـحـلـم
31 جويلية 2008 80 تعليق
زى ما بحلم ؟؟!!لااااااا
احلى ما بحلم بيك
بلاقيك
إيه يا عيال دا ؟؟
كل مرة بشوفكم بعيش الفرحة كأنى لاول مرة
الجمعة 1 أغسطس
كان معادنا مع
و نقطة التجمع قصاد المصل و اللقاح فى الدقى العاشرة صباحاً
طبعا عارفين اختكم و توترها و سهر الليالى
من تسعة و نص كنت هناك واقفة منتظرة
نجوم و قمرات التدوين يهلوا
و يغطوا بنورهم على ضى الشمس
و أنا واقفة على مرمى النظر
كان فيه شابين على بعد خطوات منى
و كنت محرجة أبادر بالسؤال التاريخى بتاعنا
هووه حضرتك مدون ؟؟!!
وجت قبل عشرة على فكرة عشان عارفة مواعيدى
و بكل شجاعة خيخية
راحتلهم و سألتهم و كان اولهم كريم يوميات مطلق
طبعاً كنت عاوزة أقوله اهلاً يا زمل بس لميت التعابين
شخصية هادية و باين عليه إبن ناس و كان عايش برا مصر
فترة طويلة من عمره فواضح عليه الصدمة الحضارية الفارقة
و شاور لنا على الشاب التانى اللى واقف بعيد و بعدين لاقيناه جاى علينا
إيهاب يا إخواننا اخلاااااق قوى و هادى و رزين و لا باين عليه
الصواريخ اللى عمال يطلقها من منصة إبداعه دى جاية منين
و لما جه يمشى سلمت عليه كأنه خلاص هيتخطف
شوية و جت صديقتى داليا
( المهندسة اللى قولت عليها فى البوست اللى فات )
و وقفنا نتكلم شوية
و جه المنسى و شاب تانى زى الفل برضو
وأعذورونى عشان انا ست كبرة
و أعراض الألزهايمر بتجينى ساعات
بس يا ريت لو دخل عندى يقولى علطول عشان أكتب إسمه هوا
أهو دخل و كتر خيره قالى إسمه يبقى الأستاذ المهذب nosha
و كان فيه كمان شاب تانى كمان مفتكرتش إسمه
آه قوس قزح فكرتنى
الشاب الأخلاق يبقى أحمد صلاح نيو فالكون يا إخواننا
رودى بنوتة مصرية الجدعنة كلها حضرت
بس شكلها مش نايمة كويس و هقولكم عل اللى جرى
لما دخلنا للتبرع و البنت خضتنا
عليها لأنها مكنتش فطرت أساساًُ و طبعاً داخت
و الدكتور قعدها شويتين تلاتة لحد ما تستعيد التوازن
و رغم كدا
بعد ما روحنا النادى كانت مهتمة هيا و خيخة بعيد الميلاد جدا
و توزيع الحاجة على الحضور و تحس كدا إنها ست بيت من بتوع الزمن الجميل
اللى ليهم نفس و شخصية مميزة و مشيت بدرى عشان كانت سايبة نور القمر
عند مامتها و البنت عمالة تزن عاوزة ماما فمشيت ماما رودى
و اللى كعادتها عملت جو من الترابط الغريب
بين كل اللى قاعدين و مش عارفة ممكن أقول إيه عليها
الجدعنة و الذوق و خفة الدم و الطفولة و العقل و النضج و المسئولية
كل دول إضربهم فى خلاط كدا
و قول على المزيج السحرى دا آبى
و جت على آخر اليوم عينينها إحمرت قووى و راحت تجيبلها قطرة من الصيدلية
و عاوزة اقول إن داليا كانت النهاردة كأنها الأم بجد و مش بكبرها يعنى
بس تحس كدا و هيا واقفة إنك منتمى ليها و مسنود عليها
و لما دخلنا نتبرع بقت واقفة عينيها علينا كلنا و بتسند
و تملى الجو بهجة
و يا داليا مش لاقيه كلام يوفيكى حقك مهما قولت
و بصراحة الولد اخلاق قوى و مهذب ربنا يحرسه يا شاهى
و عقد صداقة متينة مع سووو
( عيال ويا بعضيها بقى و دا آخر يوم لسوو فى الطفولة و خلاص هيعدى التلاتين )
و شاهى على فكرة جابت معاها خروب
و عاوزة اقولك إنى طول عمرى مبحبوش خالص
بس لما دوقته النهاردة غيرت رأيى و هبقى أشربه بعد كدا بسبب عمايل إيديكى الحلوة
و جت ميرا إمراءة بعقل رجل
و كمان جت حبيبتى اللى بقالها مدة غايبة عننا شيماء فضفضة
و اللى خست خالص و مع ذلك تبرعت و ربنا يكافئها خير
و واضح إنها مش فاضية تتلفت حواليها من الشغل
لأنى قولتلها ليه هجرتى المدونة
و مبقتيش تكتبى فقالت الظروف و زنقة الشغل و حاجات كتير
و ربنا يعينها بس كنت سعيدة قوى إنى شفتها
العدد بقى كويس و معقول و الساعة عدت عشرة و نص
فخيخة أخدت قرار من موقع القيادة
يا شباب ندخل بقى و اللى جاى يحصلنا
دخلنا جوا المركز و إبتدينا نملى الإستمارات اللى فيها بياناتنا
و بيان حالتنا الصحية
و فى إنتظار دورنا للدخول بدأ الحضوار فى التوافد علينا
إبن حجر العسقلانى الشخصية المحترمة جدا و عاقل كدا و رزين
و ماشاء الله محبوب و ليه مكانة لا تخفى على احد
و إنا كل مرة أشوفه أحس بالألفة اكتر
و كأنه جارنا او صاحب اخويا الصغير و اعرفه من زماااان قوى
أبو خالد ( ذكريات ) الراجل الطيب أبو التدوين كله
و اللى يعد وجوده علامة فارقة فى كل مدون و دا كان واضح
على وجه كل حد ييجى يسلم عليه
و بيبقى فرحان بجد إنه يعرف الراجل الطيب دا فى وقت ما بحياته
ربنا يخليك لينا و يديك العمر و الصحة لحد ما تحضر جواز يوسف يا رب …
خالد ( همس الأحباب ) الجدعنة و الأخوة كما يجب أن تكون
و الواحد ماشى جنبه كدا حاسس بالطمائنينة و إنه مسنود لو حصل أى حاجة
الواحد يستخبى وراه و ينضرب هوه بقى
و مش عاوزة أقول إنه خدنا بتاكسى من المركز لنادى الزراعيين
مع إننا كنا هنمشى
يعنى الراجل بصراحة متبنينا معنوياً و مادياً كمان
أحمد كمال ( رحايا العمر ) و كنت سعيدة جدا بحضوره
و ناس كتير كانت سعيدة بلقائه و بنفسه الهادى واحد كدا
من اللى كانت جدتى زمان بتقول عليه
دا راجل أمير
و فى دقايق سريعة قولتله إنت بتمسك مراية و تحطها فى وشنا
و تقول لكل حد واجه نفسك بكل ما فيك و عندك يا أحمد روح الأستاذية
و عارفة إننا دوشناك فى النادى بالرغى و كان نفسى تقعد اكتر
لأننا لما قعدنا لبعد كدا كان فيه فرصة أوسع للكلام
بس إن شاء الله ملحوقة المرة الجاية و المهم إنك جيت
و حسستتنا بإن لينا عندك خاطر كبير
اللى كان مفاجأة و سعيدة جدااااااااا بالنسبالى
كان شاب كدا وسيم و لطيف البت خيخة بتقولى تعالى سلمى و قولى مين دا ؟؟؟!!
– مين يا بنتى ؟؟
و هوه واقف كدا مش عارف أوصف نظرات عينيه الطيبة دى عاملة إزاى
بسسسس
محدش يمسكنى
يا خرابى على الولد يا جدعان
حاجة بجد تفرح أنا حسيت إنى بسلم على اخويا ماجد
مش حد لسه بشوفه لأول مرة
طبعاً باركتله على نجاحه و الشغل الجديد و قولتله إنه رفع راسنا
و خلانا فخورين بيه
وبقوله من موقعى هذا
يا نيجرو إنت شخص جمييييييل
و يا رب يا رب أشوف يوسف فى يوم من الأيام زيك كدا
فى اخلاقك و ادبك
و يفرح قلبى بيه جامد زى منت مفرحنا كدا
طبعا صاحب الفرح حضر
عم الشباب و الرياضى الباشمهندس سوووو ( عجوز و عندى 30 )
و اللى عيد ميلاده كان سبب أساسى فى تجمعنا مع التبرع
و طبعاً مش هتكلم عن سوووو عشان لسانى يعجز عن أى وصف
بس كفاية أقولكم إن السجاير كان حريقة و مفيش فايدة فيه
و كمان اللهم لا حسد و لا نق و لا قر
لم كمية نقوط فى عيد ميلاده من الناس يا لهوووى
أنا بقوله دا زمانه لم حق الشبكة و لو قعد شوية هيجيب تمن الشقة
و عاوزة أقول
كل سنة و إنت طيب يا سووو و فى وسطنا كدا عامل أجمل حالة
مش قادرة أختصرها فى كلمة و لا كلمتين غير
إنى سعيدة إنى أتكعبلت فيك فى حياتى و شوفتك
عيد ميلاد سعيد يا صديقى …
و وجودك فى أى مكان بيعمل فرق كبير و منتظرين تغطيتك لليوم لأنه يا جماعة
ماشاء الله ماسك الكاميرا و بيتكلم و بياكل و بيكتب حاجات كل دا فى وقت واحد
و الله الراجل دا صحفى على حق بس فين اللى يقدر ؟؟
و كالعادة ماسك الشنطة المميزة بتاعته
و سابنا بعد خروجنا من مركز التبرع و بعدين رجعلنا النادى و قعدنا نتكلم
و سالته عن حكاية الصحف الجديدة اللى هتصدر دى
و عن سبب إنشغاله الفترة اللى فاتت
عن دخول المدونات الآخرى و منهم مدونتى
و المهم إنى حاسة بحالة الأحترام و الود المتبادل
كدا تقريبا دول حزب الرجال
و فيه شخصيات جديدة عليا تماماً أرجوهم ارجوهم يعذورنى
لأنى نسيت الأسامى خالص
بس تقريباً منهم احمد حسين و هيثم الدهشان و ميدو فى الأدغال
و عمرو الطاروطى اللى وصلى سلام هدى رينبو شقيقة الروح
و اللى بيقول عليها بنته !!!
و بغض النظر عن غرابة الحكاية لكن كنت سعيدة لأن السلام وصلنى
من حد لأول مرة أشوفه لحد ساكن فى قلبى زى هدى الحبيبة
كان فيه شاب كمان مميز و مهذب فى طريقة كلامه و عرضه لأفكاره
و يسامحنى قوى و يا ريت ميزعلش لأنى لم أتذكر الأسماءكلها
و هتلاقوها فى بوست خيخة الشامل
قوس قزح لحقتنى هيا و آبى
و بشكره لأنى بعتلى على الإيميل لينك المدونة بتاعته
عشان أتشرف بدخولى فيها
و أنا مشفتش الواقعة بعينى بس إتحكالى إن ضياء يا عينى داخ و إغمن عليه
و هنقلوكو كلمة إتقالت بالحرف
الولد دا مشى و صحوه
يعنى توقيع قلب برضو بس جامد حبتين
طب دول الرجالة
نيجى بقى للكوم الكبير
البنااااااات
القمرات الطعامات العسولات يا جماعة
أنا شوفت النهاردة كام بنوتة جميلة يعنى بشكر ربنا إنى قابلتهم
و لقيتهم احلى فى الحقيقة من الصورة الذهنية اللى كانت فى خيالى عنهم
و إسم على مسمى ياسمينااااااا ولا شكلها مفروسة و لا حاجة بس شكلها فنانة بجد
و وشها معبر جدا عن البراءة و كانت جايبة معاها ألوان الرسم على الوجوه
و رسمت لكام بنت رسومات على دراعهم و على ضهر الكف
و ملحقناش بقى ترسملى الفراشة
و التى سأتمسك بها إن شاء الله المرة الجاية و هكون اول واحدة فى الطابور
و عاوزة أشكرها لأنها جت و شوفناها و كمان مامتها كلمتنى تسلم عليا
أنا بقيت حاسة إنى هختفى خجلاً من ذوقها
و هيا بتتطمن عليا و بتقول بدعيلك إنتى و يوسف
أنا بشكرك يا ياسمين على كل حاجة حلوة جت و بتيجى منك يا حبيبتى
و واضح إنها دمااااغ متكلفة و من النوع اللى بستكشف الاول اللى قصاده
و بعدين يدوس فرامل
و شكلها متغيرش عن صورتها اللى حطاها فى مدونتها
و اللى واقفة فيها بمنتهى الكبرياء و حاطلنا إيدها فى وسطها
يعنى نظام أنا كدا عاجبكوا بقى و لا إيه ؟؟
… بشكرك يا مها إنك جيتى و المرة الجاية يكون فيه مجال اكبر للكلام بإذن الله
جت واحدة من أصحاب الفرح و هيا دكتورتنا الحلوة لماضة
و اللى كنت فرحانة بيها و هيا فى وسط الكلام بتقولى يا ماما
و هيا يمكن مش واخدة بالها الكلمة دى بتعمل فيا إيه يا مرمر يا جميلة
و البنت يا جماعة خست خاااالص من كتر الأرهاق و ضغط الشغل
و كان الله فى عونها و باركنلها على النيولولك لشخصية لماضة الكارتونية
و عقبال ما نشوفها فى كتاب و هيا عمالة تقول مبتجيوش عندنا ليه
و عدناها نيجى يوم إسكندرية و خالد همس الاحباب قال هنرتب يوم إن شاء الله
يتناسب فى توقيته مع مواعيد الجميع و خصوصا إنتم عارفين
فرمانات الحاجة ام فاتيما الصارمة
و إنشالله نشوفك يا لماضة احسن دكتورة فى الدنيا
و أل إيه ؟؟
الهانم جايبلنا دفتر الروشتات نكتبلها فيه كلمات للذكرى
ماشى يا لماضة
و عقبال كل سنة يا حبيبتى كل سنة و إنتى بألف خير و احسن عن اللى قبلها …
و معاها اختها الجميلة سالى دعوة للأمل
و ياريت تقولى إسم مدونتها إيه عشان أدخلها بعد كدا و قعدت سلوى تتكلم
عن إحباطات الشغل
و دا اللى بينعكس يمكن فى بوستاتها الأخيرة و ما يملؤها من حزن و شجن
و أنا نصحتها نصيحة و إنتوا عارفين نصايحى بتودى فى داهية
بس أتمنى تنفذها و هنكون إحنا و هيا كسبانين اكيد
و البنتين الحلوين و أنا
روحنا سوا و كنت فرحانة بيهم قوى
يا عيال الواحد ماشى جنبهم فرحان كانهم أخواته و قمامير كدا
ربنا يحرسهم يا رب و يخليهم لسحورة اللى مفقوعة مرارتها من حماتها يا ولداه
بس فرحت حقيقى إنى شوفتها و شكلها يا جماعة صغنونة
و لا يجول بخاطرى أبداً
إن السفروتة دى يطلع منها كل ضرب النار اللى على مدونتها
و دا بيدل على إن
البنات المصريات وصلن لدرجة من النضج بقت أعلى بكتير من عمرهم
يعنى دعاء و مهاميهو و ياسمين و كل البنات اللى فى سنهم ماشاء الله
العقل و الرزانة و النضح و الوعى الفكرى السابق لسنهم بدرى بدرى
و المرة الجاية يا دعااااااااء تيجى بدرى شوية عشان نعرف نقعد معاكى اكتر …
فرع بورسعيد الباسلة بقى …
من الناس الجميلة قوى اللى شفتهم النهاردة
و إن شاء الله مش هنقطع عن زيارتها بعد الآن
و اللى بتجسد خفة الدم المصرية البورسعيدية بجد
و الهانم رعبتنا وقت التبرع و جالها هبوط
و خضتنا عليها و ندهنالها أخوها اللى كان جاى معاها
( شاب خلوق و ربنا يحرسه )
و دوللى قوس قزح قعدت جنبها تمسك إيدها و الدكتور يتابع الموقف
و كلنا نضحك معاها و دوللى تقولها بس عمالة تقولى للدكتور
بورسعيد
و هنوريك دلوقتى البورسعيدية هيعملوا إيه
و اول ما خدوا الدم مسمعناش صوت …
بس الحمدلله بقت بخير و آبى الجميلة خدتها فى بطوط الشبح
و راحوا النادى
و كله بقى تماما ….
إستنواااااااااا رايحين فين
فرع بورسعيد لسه مخلصشى …
لسه كمان بنتين زى العسل هما إيناس اوتار نهر الحب
و اختها نسمة الرقيقة جدا جدا
و الحقيقة إيناس شخصية جميلة و قوية و صاحبة مبدأ و عندها افكار كتير تنموية
و إستغربت إنها مش خريجة إجتماع و لا خدمة إجتماعية لأنها تصلح جداً لهذه المهام
اللى فيها تواصل مع المجتمع و كان عندها فكرة مهمة جدا
و قعدنا نتناقش فيها كتير و مش هحرق الفكرة
خاصةً إن النية إتجهت لعمل مدونة خصيصاً
أو جروب على الفيس بوك ينظم المسألة أكتر و يدى فرصة لمناقشة الأفكار
و وضع حلول عمليه ليها بس عاوزة أقولها و أقول لاختها الرقيقة جدا
إنى إتشرفت بمعرفتكم
انا حقيقى إتشرفت بكل اللى جاى من البلد دى زى أبو خالد الراجل الطيب
و داليا أهو ده عيبه و اللى مجتش للأسف
بس ببعتلك السلام يا بيبو من موقعى هذا
بلدكم دى جميلة قوى بتاريخها و ناسها …..
حد تانى جه
فكروووووووووووونى
معلش أصلى قاعدة بعصر فى مخى و جنبى شوب مانجه مفتخر ماما عمالوهالى
و بتبصلى بصة كدا نظام خلاص يا ختى إتبرعتى
و عملتيلى فيها ماجدة فى العمر لحظة
و أنا طبعاً ساكتة و حلوة و مؤدبة اهو …
دى الناس اللى جت كلها تقريباً فيما عدا ضحايا الألزهماير …
بعد ما قعدنا فى المركز البت خيخة تولت تجميع الإستمارات
و بقت واقفة على رجل تنادى علينا
كل أسم حسب ما الدكتور بيقول و اللى بيدخل يتقاس ضغطه
و بينشك فى صباعه
و نقطة الدم تتحط على جهاز لمعرفة مستوى الهيموجلوبين مناسب و لا لأ
و بعدين لو مناسب بندخل القاعة اللى بيتم فيها التبرع
و بيقعدونا على شيزلونج
الواحد بصراحة قعد عليه مش عايز يقوم
مريح و بيعمل إسترخاء أنا قولت لداليا قوس قزح الواحد عاوز دكتور نفساوى
و يقعد يعترفله دلوقتى حالاً …
طبعاً مش الكل إتبرع لأن فيه محاذير كتير زى عدم إنضباط الضغط
و أى حد عمل عمليات او صلح فى إسنانه لحد 6 شهور ممنوع عليه يتبرع
و الباقى الحمدلله إتبرع و البنات غلبت الرجالة
و الحقيقة أنا مكسوفالكم
يعنى متفوقين عليكم فى الثانوية عامة و تبرع بالدم كمان ؟؟؟
يلا معلشى ملحوقة المرة الجاية تغلبونا
و النتيجة فى الخير دايما
طبعاً فيه ناس رعبتنا و نشفت دمنا زى رودى و شيماااااااء عيلة مفترية
و نيجرووو أخويا الجميل
و ضياء المهذب
بس المحصلة النهائية هيا خروجنا من مركز التبرع و إحنا فى حالة سعادة قصوى
أنا شخصياً هتكلم عن نفسى أنا فخورة بيا
و كان نفسى يوسف يكون معايا النهاردة
عشان يبقى مبسوط من ماما و لما يكبر يعمل زيها
و ربنا كريم و مين عالم مش يمكن
إن شاء الله المرة الجاية يكون رجع و اجيبه معايا ….
روحنا نادى الزراعيين
( شكر دائم لرودى )و الرجالة راحت تصلى الجمعة
و قعدنا فى إنتظارهم نتكلم و نحكى و لما رجعوا من الصلاة إبتدت بقى الحفلة
و الفلوس تهل على سوووو من عسقول و رودى و مش عارفة مين تانى المهم
أرقام مهولة يا إخواننا إربع جنيهات ورق و نص جنيه و جنيه
يعنى الصراحة
الولد خلاص كدا عدى و مش هيعقد مع أمثالنا تانى
و جت لماضة و إتقطعت التورتة و إتوزع الجاتوه و الحاجة الساقعة
و مش عارفة مين اللى شارك فى الحاجات عشان نشكره جداً على كرمه و ذوقه
و عقبال ما تبقى كل أيامنا أفراح يا رب
الجلسة إمتدت لحد سبعة تقريباً
و ناس تيجى و ناس تمشى
و إتناقشنا فى فكرة إيناس نهر الحب
و دا غير المحادثات الجانبية ما بين الناس الحلوة اللى قاعدة
حتى تفرقت بنا السبل و جه وقت المرواح
و باقى الرجال شدوا الرحال على البورصة
و هنا ينتهى دورى لأنى معرفش اللى حصل بعد كدا إيه
و كنا نتمنى وجوده أكيد
و بعتت السلام للجميع
آبى نقلت إقتراح إيما ام البنين بعمل إفطار جماعى لينا فى رمضان
و الكل رحب بالفكرة و باقى بس تنظيمها
تم وعد لماضة و كل مدونى إسكندرية الجميلة
إننا هنروحلهم فى يوم من اوله نقضيه معاهم أن شاء الله قريب
محدش يا جماعة من اللى نسيت أسمائهم يزعل منى
أنا بعتذرلهم مقدماً كان المفروض اكتب الأسامى و معملتش
كان نفسى ناس كتير تيجى أشوفهم و ظروفهم منعتهم منهم
واحدة مفروسة و دوبا و طبعاً سبهللة و نبضات و ميادة قاف ميم و خمسة فضفضة
و …و ….. و………….
أنا شكلى هقول ال100 إسم بقى اللى عندى فى قايمة المدونات !!!
و حازم شلبى كان االمفروض جاى بس لعل المانع خير
و بطوط حبوب اللى قالولى جاى و مجااااااش
و ناس كتير كتير قوى كان نفسى أشوفهم بس معلش
دا غير طبعاً طيورنا المهاجرة اللى برا الحدود
و إن شاء الله نشوفهم قريب زى عم مراكبى و معتز وجهة نظرى
و مادو80 و إيما ام البنين
و كاميليا و هنودة و نسرينا و المهندس مصرى
و محمود الباحث عن الحقيقة و ست الناس
و مجرد خواطر و أحمد شقير و …
يوووه بقى هقول مين و لا مين يا جماعة
كل احبابى كان نفسى أشوفهم فى اليوم الجميل دا و مقدروش
بس تتعوض إن شاء الله تانى طول ما فى العمر بقية
و خلاص أنا عجبتنى الحكاية و ربنا يقدرنى مبطلش أتبرع لحد ما يقولولى
بس كفاية إنتى معندكيش دم ؟؟؟
كلمة أخيرة و ضرورية
الفضل لله فى كل شىء اولاً و اخيراً
لكن ساعات كدا
ربنا بيوقفلك ناس فى طريقك يطلعوا منك أحلى ما فيك
و ناس تعمل العكس
لكن و هيا و لا خيخة
و لا أى كلام
ليها الفضل الأول من بعد ربنا فى هذا الخير
و اليوم الجميل اللى إبتدى من بدرى قوى
و إستمر ساعات طوال و إثره هيفضل فى القلب علطول
انا بحبك يا نوران من قلب قلبى
و ربنا يخلى شريف و تشوفيه احسن و أجمل مما تتمنيله
و يكون أعلى قدراً عند ربنا و عند الناس
و عارفة إن دى هيا امنية كل ام
و مش أى ام
دى ام عظيمة زيك يا نوران
كل مرة بقى إنتوا عارفين الكلمتين إياهم
أنى فخورة إنى كنت مع ناس زيكم النهاردة
و بحبكم قوى قوى
و أغرب ما فى العالم بتاعنا دا
أنك بتحط صورة تخيلية للمدونة و صاحبها
و تعرف عنه تفاصيل كتير قوى
و يومياته و تقريباً يمكن قصة حياته أحياناً
و بعدين تقابله بعد كدا
يعنى ماشية بالعكس
و الجميل إنك لما بتقابل الناس بتلاقيهم أحلى بكتير
أنا رغيت كتير اهو عشان اللى مجاش يعرف كل سنتوفة حصلت فى اليوم دا
أسيبكم دلوقتى
و أقعد ادندن مع نفسى كلام الغنوة
زى ما بحلم بيك بلاقيك
بوستات متعلقة بالحدث الجميل دا
بت خيخة و أى كلام أنا متبرعتش يا رجالة
المنسى هكذا ….. أحلم
سوووو و قال تدرى
يوميات فنانة مفروسة جداً يووووم من عمرى
خالد همس الأحباب يوم … لكن غير كل الأيام
روح قلب ماما 
