فاكرين لما كل حد يقول كلمتين حلوين فى حقى … أقوله إنت مخموم فيا
فاكرين ؟؟!!
كان عندى سبب للكلمة دى و بيلح عليا
و زمااااااان …. عشان أسباب كتير
الواحد كان مضطرفى توقيت ما إنه …. ميقولش حاجات كتير عاوز يقولها
و عشان الخوف و الرعب من أى أذى قادم … كان لازم متكلمش
و عشان بقى الإختباء أسلوب حياة .. كان لازم مظهرش كل حاجة
و أقول بكل قوة فيا …. كل عيوبى
وأكتفى بس أقول مميزاتى أهى … شوفوها
بس مبقاش ينفع من تانى أستخبى و أسكت و اخاف ….
التلات أيام الأخيرة من يوم حفل التوقيع لحد النهاردة قلبى حاسس بشىء
غريب و مختلف مخلينى مينفعش أسكت تانى …
لأنى و بيكم بقيت حد تانى احسن و مكنش كلام بقوله و بس
عشان الفرحة اللى شوفتها فى كل عيون الناس يوم حفلة التوقيع
و هما بيقولولى مبروك من قلبهم يعرفونى قوى و لا لسه هنتعرف
عشان الناس اللى بتدعيلى من قلوبهم و بيعلقوا عندى دايما
أو حتى اللى من خارج التدوين خالص و بعتولى إيميلات يدعولى فيها
و اللى حكوا حكايتى لأمهاتهم وخلوهم يدعولى
عشان مى بهاء و دودا اللى بيسعولى حاليا فى شغل يناسب ظروفى
و يساعدونى بيه كتر ألف خيرهم
عشان محمود رئيس جمهورية نفسى اللى لسه لحد إمبارح بيعرض عليا
يرفعلى القضايا و بس أقول أيوه إبتدى
عشان دوبا حبيبتى اللى إمبارح برضو بعتالى مع خيخة إسم و نمرة محامى
مستعد يرفعلى قضية الرؤية و مليش دعوة أنا بأى حاجة
عشان محاسن صابر الجميلة اللى بكت بدموعها لما حكيتلها حكايتى
و حسيت معاها إنى بشوفنى فى مراية و كأننا قلب إنقسم نصين
عشان عاشقة الرومانسية اللى كلمتنى فى موبايل كيارا و هيا سعيدة و فرحانة
عشان بنتكلم سوا .. و مبطتلتش تدعيلى
عشان أحبابى راندا و أرابيسك و بنت القمر و زيانور و دعاء مواجهات
و محمود خايف من الحقيقة و معتز وجهة نظرى ببساطة و حازم شلبى
و هدى رينبو وشيماء سمير و احمد مهنى و امانى آخر العنقود
و أنس صاحب المضيفة و ياسمين فنانة مفروسة
و ميادة قاف ميم و بابا أبو خالد و إيما ام البنين و موناليزا
و نونو عاشقة النقاب و عم مراكبى و أحمد دردشة عربى و داليا اهو ده عيبه
و احمد كمال وسمكه واحدة و نبضات عرافتى الساحرة
و الطائر الحزين و نيجرووو و مهاميهو و أحمد مبارك
و حفصة الناس و العالم و نسرين بسيونى و شنكوتى و دكتور فانكى
و أسامى كتيييييييييييييير
مش مجرد عندى أسامى …لأ اكتر من كدا حتى لو انا مش حاجة قوى عندهم
عشان كل حد بقابله من زمان أو لسه امبارح او لسه حتى هقابله
و عاوزة و أنا ببص فى وشه و برفع عينى فى عينه
أحس إنى صح … و إنه مش مضحوك عليه فى المشاعر دى
عشان كل حد جميل دخل المدونة دى من يوم ما عملتها بعد ما مشى يوسف و لحد النهاردة
كل اللى دعالى و شد على إيدى و ربط على قلبى
من غير ما يفهم كل حاجة و إحترم خصوصياتى لأبعد حد
عشان كل قلب حبنا أنا و يوسف من غير غرض و لا عاوز من ورا تعليقاته عندى حاجة
عشان كل مدون و مدونة عارفين نفسهم بالإسم … عرفتهم من بدرى
من اول لقاء تدوينى روحته فى أبريل 2008
و حتى آخر واحد إمبارح مارس 2009
عشان مبقتش خايفة و لا قلقانة و لا بترعبنى عفاريت و لا أشباح
و عشان متبقاش محبتكم ليا منقوصة او مخدوعة او فيها إستغفال من ناحيتى
و عشان احس إنى رجعت فاطمة الللى كنت بعرفها زمان
و اللى إنتم ساهمتم كتير قوى فى إسترداداها لنفسها
فاطمة اللى لما بتحب حد … مبتخبيش عنه حاجة و لا بتحاول تستغل مشاعره
و لا بتخبى عيوبها عشان تحصل منه على مكاسب و لتكن مكاسب عاطفية … فى حالتنا دى
مش عاوزة حبكم و تعاطفكم دا يكون مبنى على قلة معرفة و خداع من جانبى
و عشان دا ميحصلشى و محسش بذنب اكتر من كدا
و عشان كل القلوب الحلوة اللى غمرتنى بحبها طول المدة اللى فاتت
و دايما أقولهم إنتوا مخمومين فيا …آن أوان إنتهاء الخمة دى
و عشان يوسف و كمان عشانى
عشان دا كله
هكتب البوست الجاى
أتمنى تقروه بقلبكم كالعادة
بحبكم و …. علطول
روح قلب ماما 
مارس 07, 2009 @ 17:13:00
قلبي طماطم
والله والله والله
لو كتبتي ايه
ولو قولتي ايه
ولو عندك ايه حتي
هفضل احبك ومن قلبي طووووول عمري
وافتكرك وادعيلك
ومش انا لوحدي
كتييير غيري
ومين حبه ربه حبب فيه خلقه
بحبك فالله
مارس 07, 2009 @ 17:24:00
بصي يا فاتيما عايزة اقوللك شئ
دلوقتي فلسفة انك تكشفي نفسك و تقولي علي حاجات ممكن تسئ ليكي او تغير فرة الناس عنك و في نفس الوقت الحاجات دي ملهاش اي لزمة انك تذكريها
اقوللك بجد بلاش
انك تصدمي ناس بتكن ليكي حب و احترام و مش عايزين حتي يعرفوا اي شئ عنك
فعلا بلاش
فيه ايه بتقول ” يا ايها الذين امنوا لا تسئلوا عن اشياء ان تبدي لكم تسؤكم “
يعني ايه الكلام دا
يعني مش كل حاجة لازم الواحد يسئل عنها , و فعلا مفيش حد كامل بدون غلطات
و مش معني اننا نتبرأ من عيوبنا او ذنوبنا و نستغفر ربنا عنها و منكررهاش يبقي احنا عايزين نبان في صورة مثالية و عايشين في تناقض
ابدا
بس مش كل الوحش لو بان هتبقي حاجة حلوة
انا رأيي انه بلاش
انت صورتك حلوة عندنا كلنا
و انت مش بتخدعينا ولا حاجة علشان تقولي كلام مش تمام
اسوأ شئ ان ربنا يستر واحد و يرحمه و يغفر له و يقوم العبد دا يهتك ستر الله عليه
انا لا اقصد اي شئ وحش علي فكرة بس حتي لو كانت كلمة بسيطة , بلاش تحكي فعلا مش حاجة حلوة و دي فلسفة فعلا بكرها اوي
مارس 07, 2009 @ 17:45:00
مالك يا فاتيما… فيه ايه بس
ايه لازمه البوست ده
علي فكره ما فيش انسان مثالي
وعلي فكره برضه مهما قلتي ومهما كتبتي
اكيد كل اللي بيحبوكي ولا هيهمهم
لأن اللي بيحب حد ما بيشفش فيه اي عيب
بس بالله عليكي رجاء ما تكتبيش حاجه
اكيد كل اللي قرا البوست ده فهم انتي عاوزه تقولي ايه وده كفايه
الحكايه ما فيهاش خداع ولا يحزنون
كل التحيه والاحترام ليكي يا فاتيما
مارس 07, 2009 @ 17:46:00
ليه يعنى يا بنتى
هو مين فينا الى مافيش فيه عيوب
عيوبك لو انتى شايفاها ده يبقى حاجه عظيمه اصلا
ولوماحبتيش تقوليها مش مشكله برضه
حابه تقوليها وتفضفي ونقولك ده عيوب هبله
واخطاء عبيطه ههههههههههه
برضه مش مشكله
ويمكن تطلع مش عيوب تطلع مميزات وانتى مش واخده بالك
لكن يعنى تفتكري حد فى الدنيا خالي من العيوب والاخطاء ؟؟
مستحيل طبعا
مارس 07, 2009 @ 17:58:00
ليه كدة مخمومين ليه
بصى اكيد فى فى كل منا متناقضات دة عادى احنا بشر والبشر ليس بالملاك ولا الشيطان واحسن حاجة اننا نعيش كبشر لينا هفوات لينا اشياء المهم الغالب جوانا ايه الخير ولا الشر واكيد الغالب هو اللى هيظهر للناس وجميل انك تحسى انك عايزة تعرفى الناس بيكى اكتر جميل بصى وكفايه حبك للاخرين واحساسهم بوقوفك جنبهم وحبهم ليكى وانهم يحكولك ويرتاحوا لكى دة اكيد مؤشر جميل
ان احب الله عبدا حبب فيه خلقه
دة بيتهيألى كفاية ودة مش خمة ولا حاجة
تحياتى لكى ياقمر
وخمة ايه ياجميل روق انت بس
مارس 07, 2009 @ 18:36:00
خيررررررررررررر يا فطوم
بصى
لو كتبتى ايه انا برضه بحبك لان الانسان مش بيختار بعقله اللى يحبه ولما يوزن مميزاته وعيوبه ويلاقى كفه مميزاته راجحه يقوم يقرر انه يحبه
لا لا لا
الحب ده راحه نفسيه لانسان حتى لو مش تعرفيه
انسان تحسيه ويحسك وتحسى انه قريب لقلبك
مش شرط يكون ملاك
انما احنا بنشوفه ملاك لان العين مش بتشوف عيوب اللى بتحبه
وانا بحبك والله
ولو قولتى ايه هفضل احبك وادعيلك ربنا يريحك قلبك ويرد ليكى يوسف ويفرحك بيه
ويخليكى لقلبى يا حبيبه قلبى
مارس 07, 2009 @ 19:02:00
العزيزة فاطمة
اسمحى للى ان اكون من المشتركين فى مدونتك وايضا فى حبك
اولا ومن غير ماعرف تفاصيل ربنا معاك دائما وينصرك الله فى كل قضايك
ثانيا: حينما نحكى وبصدق نتخفف من حمولنا …… ونشعر براحة كبرى
ولكن ليس مهم ما كنا …
المهم نحن الان..
وغدا ………….. ..
ومن منا بلا ذنوب……….
اننا بشر …………
وخير الخطاؤون التوابون.
المهم قلبك الان با فتاة
قلب يحمل الحب و الخير والرحمة.. ام لا.
فلا تكتبى شيئا
ولا تحكى لاحد شيئا..
فما فات قد فات
حتى لو كانت فتافيت تافهة او صغيرة……
تحياتى ودعواتى
مارس 07, 2009 @ 19:10:00
انا اسمي مش مكتوب عااااااااا
بس اقولك سر ومحدش يقراه
عارفه امبارح لما اخدت الحضونه والله والله والله تلاته بالله العظيم متعرفيش الراحه اللى انا بقيت فيها وانتى عارفه ان جوايا هم كبير بس لما اخدتينى فى حضنك حسيت قد ايه انا مرتاحه وقد ايه شيلتى عنى كتير مع اننا متكلمناش وكنت سعيده اوي
على الرغم من تحفظاتى عليكي اللى بقولها ليكي فى وشك دايما علشان الضعف اللى كنتي فيهبس ربنا عالم انتى وناس كتير ايه بالنسبه ليه يا طمطم
بجد عالم التدوين على قد ما فيه من زبالات فيه ناس حنينه وجدعه ويغنوا عن العالم كله
مارس 07, 2009 @ 19:24:00
لا انا مش مخمومه
متحاوليش
الشوكلات بتاعتك لسه معايا على فكره
:))
مارس 07, 2009 @ 19:57:00
يوميات فنانة مفروسة جدا
يا حبيبة قلبى يا ياسمينا
إنتى من الناس اللى متهيألى مش هتفرق معاهم قوى
بس ضرورى تعرفى و لازم حبك دا اقابله بما يوفيه …
بوسيلى ماما و أنا كمان بحبك
مارس 07, 2009 @ 20:00:00
شمس الدين
بصى يا شموسة
أنا طبعا بحترم رأيك جداً و فلسفتك كمان
بس إنتى من الشخصيات النارية و الحماسية جدا و المثالية جدا كمان
و تعليقك دا خلانى أصر على البوح اكتر من الاول
عارفة ليه ؟؟
عشان إنتى بقى بالذات منتظرة رد فعلك هيكون إيه
و حكمك هيكون شكله إزاى …
و مش زعلانة من دلوقتى لو حبيتى متدخليش هنا تانى او تبصيلى بشكل مختلف
بالعكس كدا هيكون أفضل ليكى
و ليا أنا كمان
خالص حبى ليكى يا شموستى
مارس 07, 2009 @ 20:01:00
MADO 80
مفيش حاجة يا مادو انا زى الفل
و فى لحظة صراحة جميلة معاكو
مالكو يا عيال ؟؟
مخضوضين ليه كدا ؟؟
مارس 07, 2009 @ 20:05:00
صبرنى يا رب
يا ام القمرتين إنتى قربتى شوية من هدفى
الفضفضة …
بس كماان عاوزة اتأكد من إن نظرة الغحترام و الحب اللى وصلانى من الكل دى أستاهلها فعلاً
و لا مبنية على حاجات ظاهرة بس و الباقى مدارى
لو الحاجات اللى مش معروفة دى هتغير من الصورة يبقى أفضل ليكم و ليا إنكم تعرفوها
بكرة تقرى البوست
و تحكمى و تقوليلى
بوسيلى البنات و سلامى لزوجك العزيز
و عاوزة أقولك حاجة ملهاش علاقة بالبوست خالص بقى بس عاوزة اقولها من بدرى
إن مدونة طابخين إيه النهاردة تحفة و مميزة بجد و بتعلم منها حاجات قعدت أعملها سنين و اخد تريقة عليها
منها المايونيز اللى لما عملته اول لما فتحت الخلاط و دوقته دعيتلك ربنا يباركلك …
بس خلاص
مارس 07, 2009 @ 20:07:00
رئيسة حزب الاحلام
أنا رايقة أهو يا لولى
مفيش حاجة
و منتظرة رأيك بعد البوست الجاى
خالص حبى يا حبيبتى
مارس 07, 2009 @ 20:08:00
حنين القلب
خيرررررررررررررررر يا حنونة
إنت عارفة …
منا قولتلك كل حاجة لما جيتلك إسكندرية و بعبعنا سوا
إنتى عارفة القصة و مش من المخموين متقلقيش
بحبك يا جنية البحر الجميلة
مارس 07, 2009 @ 20:10:00
القدر و أنا
الاول منورة المطرح
ثانيا غنتى جاية فى وقت فاصل من عمر المدونة و دا كويس عشان تقررى هتيجى تانى و لا لأ
لما قررت أحكى مش بحكى لحد معين عشان عاوزة حاجة
أنا بحكى لأن المفروض كنت أعمل كدا من بدرى بس الوقت و الشجاعة واتتنى الآن
المهم
إنتى نورتينى
مارس 07, 2009 @ 20:14:00
APPY
إسمك مش مكتوب عشان إنتا مش من المخمومين يا قمر التدوين كله
إنتى عارفة البير و غطاه إنتى و خيخة و دوبا و سبهللة و كام حد جميل كدا صادف و حكيتلهم …
انا بقول على الباقى و اللى ميعرفشى
أما بخصوص الحضونة
فإنتى عارفة … لازم تاخدى حضوناتك تمام مش اى كلام
إنتى كمان إنسانة متميزة و بفرح قوى لما بلاقيكى جاية من بعيد و بحس إنك مينفعش نلاقى بنت فى تركيبتك دى
يعنى قوة و رقة
خفة دم و جدية
شجاعة و إحترام
جدعنة من هنا لبكرة
و الواحد معاكى يبقى مطمن و حاسس بأن الدنيا لسه فيها خير
معاكوا كلكم بصراحة
و دا اللى مشجعنى اتهور و اتكلم
بحبك أنا كمان قوى
قوى
مارس 07, 2009 @ 20:15:00
طوما الجميله اعتقد انك حتكتبى حاجه تحببنا فيكى اكتر و اكتر
صعب ان حد يكرهك يا قمر و متحاوليش
مارس 07, 2009 @ 20:15:00
لماضة
ايوه يا حبيبة ماما
إنتى عارفة الحكاية و مش من المخمومين
بس إيه دا ؟؟
لسه الشكولاته معاكى ؟؟
ليه كدا ؟؟
كليها و هجيبلك تانى كتيييييييير لما نيجى نزوركم فى إسكندرية ميهمكيش
بوسة و حضونة يا حبيبتى
مارس 07, 2009 @ 20:18:00
صيدلانية طالعة نازلة
طب مش لما تقرى الأول و بعدين تشوفى !!!
مش بحاول حاجة يا حبيبتى
أنا بس عاوزة اكون صريحة لآخر حد عشان الحب دا يكون من حقى لآخر حد
نورتينى
مارس 07, 2009 @ 20:26:00
حبيبتى الغالية
احنا بشر مش ملايكة
وانا عن نفسى بحبك زى ماانتى سواء كتبتى عن حاجات مانعرفهاش او ماكتبتيش
بنحبك وبس وبدون اسباب:)
بوسة كبيرة لطماطم الجميلة والف مبروووك على اشتراكك فى كتاب مدونات مصرية ويارب دايما من نجاح لنجاح
مارس 07, 2009 @ 20:57:00
يا لهوى يا فاتيما
اللى هو ممكن كل حاجه تيجى على بالنا من دلوقتى لحد البوست ما ينزل؟؟!!!
يعنى انا اجيب منين اخماس واسداس انزل فيهم ضرب؟؟؟؟
ماشى حتى لو قلتى ان انتى كنتى راجل واتحولتى بحبك
وقولى اللى تقوليه بقى …
عشان تحرمى تعملى suspense
مارس 07, 2009 @ 20:58:00
ما أظنش أبداًإني مخدوع فيكي
إنتي إنسانة طيبة و رقيقة
مارس 07, 2009 @ 21:08:00
يعني انا لما ادونا اجازه وجالي وقت اخيرا ابص في المدونات الي بحبها الاقيكي عامله دراما
انا يا ستي بعزك زي ما انتي .. ومفيش حاجة اسمها مخموم فيا ..
زي ما انتي زي ما بعزك .. وانا عارف انك طيبه اوي ..
ولما يجي يوسف هقله قد ايه انتي بتحبيه وان البوست ده كان في ساعه انتي متضايقه فيها مش اكتر
يلا بقى اضحكي .. دا انا ما صدقت قدرت اجي اسلم عليكي الاقيكي كده ؟
مارس 07, 2009 @ 21:27:00
اول مره اعرف ان مدونتك مفتوحة للتعليقات
وبعد تعب اخيرا عرفت اعلق
كفاية كده لغاية دلوقتي
ابقى نكمل بعدين
مارس 07, 2009 @ 21:42:00
موناليزا
متحرمشى منك يا مون مون
انا كمان بحبك
و عقبالك العدد الجاى لما نباركلك
مارس 07, 2009 @ 21:44:00
dodda
لأ بقى
إنتى بالذات متقوليش يا لهوى دى
إنتى من الناس الى مش مخمومة يا ست
متتخضيش كدا
و حوشى الاخماس عن الأسداس
و تعالى هنا إيه حكاية راجل دى كماااااااااااااااااان
بحبك يا ست الهوانم
مارس 07, 2009 @ 21:45:00
مهندس مصرى
الله يكرمك يا محمد
متحرمشى منك أبداً
بس تقرى برضو و تبقى تقولى رأيك
مارس 07, 2009 @ 21:48:00
ahmed mubarak
ساعة ضيق إيه يا حنون و مبيحبش الجبنة
بالعكس دنا رايقة جدا و آخر تمام يا احمد
و كونى هقول حاجة متعرفهوش مش لازم تكون دراما قوى كدا
لو عاوز الحق هيا اصعب من الدراما
بس حاسة إنكم لازم تعرفوها
مش هيجرى حاجة
على فكرة يوسف عارف الحكاية دى
و حكيتهاله قبل ما يروح لباباه
عشان يسمع منى زى ما هيسمع منهم
و يصدق اللى حابب يصدقه
خليك زيه بقى و أبقى قولى رأيك بعدها
خالص ودى يا غالى
مارس 07, 2009 @ 21:54:00
الباحث عن الحقيقة
ازيك يا أستاذ
التعليقات مفتوحة اهو
و حمدلله على السلامة للناس اللى خلعت من مشوار التبرع
و متعمولهاش فى المرة الجاية يا ريت عشان نشوفكم بقى
خالص تحياتى يا أستاذ
مارس 07, 2009 @ 22:25:00
فاتيما
روح قلب ماما
روح قلوبنا كلنا
سامحينى اولا انى بقالى كثير مش بجاي عندكبس هى الظروف القاسية والله
اتمنى تكونى بخير سلام وامان
اما عن البوست دا
اظن انه محدش مخموم فيكي ولا حاجة
عاوزة تكتبى اكتبي
انا من رأييى تكتبي
وهتشوفى انه كل الناس هيقولك بعد البوست اللى جاي
بنحبك اكثر واكثر
ام يوسف
احنا مش ملايكة ولالا شياطين
ولو دخلتى عندي هتلاقينى كاتب فى اول المدونة
جميعنا على الارض بشر لامنا ملائكة ولا شياطين وانتهى زمن الانبياء
ام يوسف
فى تدويناتك كتبتى نفسك بدون اى قشور وبدون اي زيف وبدون اي قناع
متخيلة ن في حد اهبل
هيبص يهتم بالقشور ويسيب الاصل والجوهر اللى حبناه كلنا
اكتبى كل اللى انتى عاوزاه
وهتشوفى وتقولي
انك انتى اللى كنتى مخمومة فى حب الناس ليكي
ومكنيش تعرفى انه فولاذى التكوين
انا عملت مدونة جديدة اسمها
ادب الاطفال المكتوب للكبار
اتمنى تبقى تزوريها
تحياتى اجمل ام فى الدنيا
كريم بهي
مارس 07, 2009 @ 22:31:00
على فكرة بقى انتى حد كويس جداااا ومهما تقولى مينفعش حد بالطيبة اللى فى عنيكى دى كلها يكون وحش
انا من ساعة مشوفتك فى اللقاء وانا بحكى لماما و اخواتى عليكى وازاى انتى حد طييييب اوى
والنهاردة كمان حكيت لصحابى عنك وهاخدلهم الكتاب بكرة عشان يقرو البوست بتاعك
بجد انا حبيتك اوووووووى ومبسوطة انك وقعتيلى
رنا يسعدك ياارب
مارس 07, 2009 @ 22:36:00
فين اسمى يا بطة عااااااااااااااا
يا حبيبتى انتى مش محتاجة تقولى حاجة ,, كل الناس ليها شوية حاجات مقفول عليها ستارة ومش معنى كده انهم وحشين
.. بس احيانا بيكون فيه مشاعر الواحد ما بيعرفش يعبر عنها بكلام فبيضطر يسكت
ربنا يكرمك
مارس 07, 2009 @ 23:34:00
عيني علي الناس اللي بتوعد وتخلف
مش هقول اكتر من كده
هزورك وهجيلك
وهتاابع باستمرار
دنا زعلان زعل
بس ع العموم وحشتيني بجد
واللي فات كان هزار
مستنيكي
برقش
مارس 07, 2009 @ 23:44:00
يابنتي هافهمك على حاجة
انتي دخلتي جوة القلوب وخلاص
تعملي اللي تعمليه بأه…والله لو كتبتي ايه…مين فينا كامل من مجاميعه احنا بني آدمين يا فاتيما…الحب بس هوه اللي مخلينا قادرين نكمل
بنحبك ومافيش فايدة من اللي بتعمليه
المكان كله محاصر..بناس مايهمهمش غير فاتيما اللي حبوها زي ماهيا على بعضها كده
:)))))))))))))))))))
مارس 07, 2009 @ 23:49:00
انا عن نفسى صدر منى افعال اخجل من انى احكبها
والحمد لله ماعنديش ازمة
لو الحكاية بتاعتك كدا
بلاش تحكيها بشكل شخصى
احكى عن واحدة صاحبتك واحنا نعمل نفسنا عبيطين
حلوة عبيطين دى
عموما انتى شوقتتينى للمشكلة الحكاية دى
بقالى كتيلر ما قريتلكيش
بس هاستناكى
ياللا اكتبى
مارس 08, 2009 @ 00:16:00
مهما تقولي يكفيني اني شفتك باحساسي وانا احساسي عمره ماكدب عليا والبوست اللي هتكتبيه دا دليل علي ان احساسي صادق وهو انك حد طيب اوي
مارس 08, 2009 @ 00:23:00
طمطم ياقلبى
انتى بتعملى مقدمات لموضوع منتهى
بحبك حتى لو كنتى من عصابه فى شيكاغو
بحبك حتى لو كنتى مين
كفايه عليا احساسك ورقتك
وقلبك الطيب فى زمن مبقاش فيه كتير طيبين
بحبك ومش هابطل احبك ابدا
فاتيما
عيشى فرحتك
اوعى تفوقى نفسك او تحاولى توجعى قلبك تانى
كونك بتكسبى مكاسب عاطفيه فده لان الجزاء من جنس العمل واللى يحس بالناس لازم كل الناس تحس بيه
انا كل بوست عندك باقراه بقلبى مش اللى جاى بس
والبوست ده قريته بقلبى ياروح قلبى
نفسى اشوفك وابقى طماعه كمان
انا باكتفى بالتعليقات واحساسك بيه
ملحوظه هاااامه جداااا
يوم الجمعه انا بعت رساله لكيارا باقولها انى عايزه احضن العالم كله
قولى كده لفاتيما
وهى قالت لى انها بلغتك
ربنا يسعدك اضعاف اضعاف سعادتى بالكلام معاكى
مارس 08, 2009 @ 00:54:00
كريم بهى
منور يا كريم
مسمحاك يا بنى و انا كمان مقصرة معاك
متشكرة قوى على ثقتك دى
و ألف مبروك على المدونة الجديدة
خالص تحياتى و ودى
مارس 08, 2009 @ 00:56:00
original heart
يا فندم اخجلتمونا
و كتر الف خيرك على كل المشاعر الحلوة دى …
و ليه بس تنكدى على إصحابك و ماما و اخواتك !!!
ميرسى يا حبيبتى و متحرمشى منك أبداً
مارس 08, 2009 @ 00:58:00
dreem
إسمك مش مكتوب فى البوست
بس مكتوب ف قلبى يا دريم
و مش عارفة ليه يتهيألى إنى عارفة رأيك مقدما و متأكدة منه
يمكن لأنك ام و غالبا سمعتى القصة اللى هحكيها قبل كدا اكيد …
يمكن
ربنا يكرمك إنتى يا حبيبتى
مارس 08, 2009 @ 01:00:00
maii bahaa
يا ميومة يا بهية
إنتى كمان مش من المخمومين
و متهيالى عارفة هقول إيه
مش كدا ؟؟
طيييييييييب
يعنى المكان محاصر
و أسلم نفسى !!!
و أنا لسه هسلم نفسى يا مى ؟؟
بحبك قوى
مارس 08, 2009 @ 01:02:00
danty elmasry
ياااااااااااه
حمدلله ع السلامة
بقى بقالك ييجى خمسميت سنة مجتش و تجيش غير على البوست دوا ؟؟!!
طيب
بس فكرتك دى هيا اللى هنفذها …
بس مش عشان حكاية العبيطين دى
لأ لأسباب تانية خالص
أما نشوف
المهم إنت نورت بعد غياب
مارس 08, 2009 @ 01:03:00
كيارا
يا حبيبتى قلبك فيه الخير كله
مارس 08, 2009 @ 01:08:00
عاشقة الرومانسية
شفت الرسالة يا دودو
و مش قد الحب دا و الله
ربنا يسعدك يا حبيبتى أكتر و اكتر
أنا مش بخدش فرحتى و لا بحاول أزعل روحى و أرجع للماضى و لا حاجة من دى خالص
أنا بحاول أخلى اللى بينى و بينكم و بين الدنيا بحالها صافى و أبيض و مفيهوش أى رتوش و لا نقط سودا …
أنا راضية عن نفسى الحمدلله
و لو حد بصلى بنظرة مش تمام
مش هيهمنى على فكرة
بالعكس … اللى مش عاوزنى مش هيفرق معايا بعاده عنى
هريحه من عبء معرفتى ببساطة
البوست هيكون وسيلة غربلة غير تقليدية …
هعرف بيها حاجات كتير يمكن اكتر ما هتعرفوها إنتم
إنتى بقى من الناس اللى عارفة رأيهم من دلوقتى …
ربنا يخليكى يا حبيبتى
و متحرمشى منك
بوسات و حضونات كتيييييييييير
مارس 08, 2009 @ 01:08:00
طمطوممم ياعم انت فرحانة الفترة دى مستخسرة فى قلبك الفرحة دى ياخراشى منك ياخراشى اعمل فيكى اية بس
اديكى بوسة وخلاص ههههههههه
ياعم الفرح جاى كتتتتير والحب بينا بيكبر اكتر
بصى ياطمطم ان الاوان دلوقتى تكتبى عن افراحك حبك لاصحابك لكن علشان تقولى اخطاءك لية ومين هيحاسب حد على خطئة وهو كمان عندة كدة الكل لية اخطاءة ياقلبى محدش معصوم منها لكن بلالالالالاش البوست الى جاى مشيها فرح بقى وبكرة اجمل من امبارح
بحبك اوى ومش مخمومة فيكى علشان عارفة ان قلبك جمييييل جدا وبرئ جدا وطفولى جدا ومش كتير عندهم كدة
حبيبتى خلى بالك منك شوية وبلاش حكايات الخم وكدة الكل فاهمك صح اوى وبيحبك اوى اوى ومعاكى بروحنا وقلنا اوى ودة المفروض يسعدك ياعم
برضة بحبك اوى اوى
مارس 08, 2009 @ 01:33:00
طمطم يا جميلة
انا مبسوطة من حالة التصالح مع النفس اللى انتى فيها دى
بجد مبسوطة ان الحمد لله ربنا فك قيدك .. لانى كنت حاسة انك بتتعذبى وبتتدارى ومش عايزة تواجهى حد
حسيت بانكسارك وقلة حيلتك وخوفك من اى حد تعرفيه يقابلك
الحمد لله يا حبيبتى انتى كده بجد على اول الطريق فى انك ترجعى يوسف لحضنك .. وده اهم شئ عندك وعندنا
أيا كان اللى عايزة تقوليه مش هيفرق مع قلوب حبتك بجد وخافت عليكى وشالت همك ودعيتلك بظهر الغيب وهى متعرفكيش
أهم حاجة انك تفضلى قوية وراسك مرفوعة عشان لما يوسف يرجعلك ان شاء الله يلاقيكى افضل بكتير من الحال اللى سابك عليه عشان يفرح بك ويفخر بيكى ويقدر يتسند عليكى
بحبك فى الله يا حبيبتى والله
ربنا يرجعلك يوسف بالسلامة قريب يارب
مارس 08, 2009 @ 01:36:00
انتي اللي انسانه شفافه اوي
وفيكي كل الخير
مارس 08, 2009 @ 02:02:00
فاكره زمان يا فاتيما لما قلت في مدونتي اني عايز اتعرف على كل الناس اللي باقرالهم وبيقرولي ونعمل حاجه مع بعض
فاكره ساعتها ردك كان ايه
قلتي بما معناه .. انك ماعندكيش الجرأه انك تخوضي تجربة التعارف الشخصي .. وساعتها قلتلك يافاتيما كلنا مجروح .. وكلنا بنتسند على بعض
دلوقتي انا بجد بجد بجد .. في قمة السعادة ان فاتيما اختي وام يوسف ابن اختي .. عندها القدره على مواجهة اي حد واي شخص
ربنا يارب يارب يوفقك ويحققلك كل اللي بتتمنيه ويسعدك دنيا وآخره يارب
سلامي لوالدتك وقوليلها كل سنه وهي طيبه .. وعايز حصان المولد بتاعي ولا مؤاخذه
سلاموووووووووووووز
مارس 08, 2009 @ 03:12:00
السلام عليكم ورحمة الله وبركاته
ازيك يا طمطم
اولا مبروك يا ستو انا علي الكتاب ويارب عقبال الكتاب بتاعك انت لوحدك واللي يبقي اسمك علي غلافه ونيجي نحضر حفلة التوقيع ونترجاكي تمضيلنا عليه
ثانيا كل سنة وانت طيبه ياتري كلتي حلاوه ولا عامله رجيم :)))
ثالثا بقي وده المهم مهما هاتقولي يا قمر عمر نظرتي ليكِ ما هاتتغير واعتقد اني كونت عنك فكره مش بطاله من خلال كتاباتك هنا وكلام الناس عنك واعتقد انها هاتكون فكره الي حد ما صحيحه ومهما يكون يا قمر اي كلمه كابسه علي نفسك وخنقاكي طلعيها علي طول ومايهمكيش هاتفضلي دايما حبيبتنا كلنا
سلام
مارس 08, 2009 @ 04:13:00
فاتيما
العرب زمان كانوا يبصوا فى وش الواحد يعرفوا علطول صفاته وانا شخصيا شفتك مرة واحدة لكن مش ممكن اكون اتخميت فيكى وبالتالى اى كلام هتقوليه بالنسبة ليا مش هيفرق
وانا دايما قبل ما بحكم على حد بركز دقيقة مع نفسى واتبادل معاه الادوار ساعتها الامر بيختلف تماما
التدوين زى ما بيقولوا تجربة حياة واهم حاجة انك بقيتى قادرة تواجهى كل مخاوفك
انا كمان التدوين غير فيا كتير قوى
انت من الناس القليلة اللى بيكتبوا من قلبهم
ربنا يجمعك بيوسف على خير
تحياتى
مارس 08, 2009 @ 04:13:00
انا بدأت اغير من البت كيارا
عايزه اشوفك بقى هه اشمعنى هى
ماليش دعوه
عااااااااا
مارس 08, 2009 @ 07:18:00
ايه البعتة دى
وانا اللى فاكرة انك هتقولى اللى عايزة تقوليه فى اخر البوست
اقوم الاقى ان البوست ده مقدمة لبوست الجاى؟
طب يلا انزلى بالبوست اللى فيه البهاريز
عايزين نعرف ايه هى الخمة
ولو انى معتقدش ان حد فينا اتخم فيكى يا فاتيما
وقبل ما تكتبى البوست
اوعى برضه علشان خاطر حد تكتبى حاجة مش عايزة تكتبيها
متعمليش حاجة علشان خاطر حد
اعملى اللى انتى عايزاه وبس
وافتكرى دايما ان احنا بنحبك جدا
بعيوبك قبل مميزاتك
سلام
اختك خيخة
مارس 08, 2009 @ 08:29:00
احنا كلنا بنحترمك وبنعتز بيكى
دة حقيقى فعلا.
اما مشاعرك ناحية ابنك يوسف من حب جارف فتاكدى ان فية ناس كتير تتمنى تحل الموضوع دة من قلبها
مارس 08, 2009 @ 09:14:00
أكيد يا فاطمة مفيش حد كامل و أكيد كلنا بنلاتكب أخطاء بس أكيد برضه ان دي حياتنا و المفروض ان لينا الحق المطلق اننا نتصرف فيها زي ما احنا شايفين حتى و ان كان نظرتنا غلط و الأكيد أكتر ان مفيش انسان على وجه الأرض من حقه يحرم أم من ابنها و من حتى أبسط حق من حقوقها انها تشوفه و يشوفها و لو مرة واحدة في الاسبوع..حتى لو كنتي عاملة أخطاء الدنيا كلها فعلى الأقل عشان يوسف نفسه و نفسيته.مهما قلتي يا فاطمة محدش حيبطل يدعيلك و لا يتعاطف معاكي لأن قلبك كبير قوي و جميل قوي قوي
مارس 08, 2009 @ 09:48:00
ممممممم … انا اسمي مكتوووووب
((( لأ )))
طيب … 🙂
عموما الواحد لما بيقرا لحد مايعرفوش بيكون عندة انطباع بينطبع في دماغة لغاية مثلا مايقابلة أو لغاية ما يشوفة بيتكلم مثلا … و بما اني شفت حضرتك يوم الجمعة اللي فات .. بس انا قلتلك اول ماشوفتك .. انا لما شفتك قلت ان حضرتك فاتيما روح قلب ماما .. كمان مكنش دة رأيي لوحدي 🙂
انت انسانة جميلة جدا 🙂
سلميلي على يويو بقى
مارس 08, 2009 @ 10:31:00
اولا الف مبروك علي الكتاب و الحفله الحاجات دي من ضمن الحاجات الي بفتقدها جدا بره مصر اني اشوف و احس بالروح
ثانيا انتي شايفه حاجات عملتيها في حياتك انها مشكله او تسئ ليكي او ضعف منك انتي مكبراها بس مش اكتر شوفي دايما الجانب المشرق منك هتلاقي مميزات كتير يكفيكي فعلا حب ناس من غير مايعروفوكي
تحياتي
مارس 08, 2009 @ 13:37:00
من يملك قلبا طيبا لايستطيع ذلك
حتى وان حاول لفترة ما .. فان حب الجميع الحقيقى الذى بلا هدف .. سيمحو كل ماتعلق من شكوك ومن خوف ليظهر الجوهر الجميل الحقيقى لارقى فئة تمثل اليوم طبقة المثقفين الحقيقية فى مصر .. وانت من بينهم
مبروك مرة أخرى للكتاب .. ومبروك علينا انت
مارس 08, 2009 @ 22:26:00
فاتينا الجميله
الانسان ليس معصوما من الاخطاء
وعليه فكلنا عيوب
متشقيش على نفسك يا ام يوسف
وبعدين اللى حبوكى حبوكى مش عشان حكاياتك
حبوكى عشان انتى كويسه فعلا
كلنا كنا بندعيلك عشان فعلا ربنا ينصرك
وحنفضل ندعيلك بالنصر وندعيلك وندعيلنا بالهدايه لو كنتى عملتى شىء غلط
ومين فينا معملش اخطاء يا فاتينا
دا كلنا من جوانا اخطاء وربنا ساترها علينا ربنا يغفرهالنا
ربنا غفور رحيم
سومه
مارس 09, 2009 @ 00:20:00
اهلا وسهلا
بخصوص الصور المنشورة فى موقع بلوجرز تايمز من حفل التوقيع فا هى صور عامه ملتقطه من مكان عام فى مناسبه عامه فا انا لقيت ان من الصعوبه انى اسال كل واحد عاوز ينشر صورته ولا لاء لان العدد كان كبير جدا حتى الصور اللى حضرتك ظاهره فيها كان ظاهر فيها ناس تانيه .. لكن طبعا لو مترحبيش بنشر صورتك قوليلى وانا هتصرف حتى لو هشيل الصوره خالص لان ده ابسط حقوقك . انا بس حبيت اوضح انا ليه مسالتش حد على موضوع الصور
واسف جدا لو كنت سببت لك اى ازعاج بسبب نشر الصور
تقبلى تحياتى .. وابقى زورى مدونتى دايما لان رايك يهمنى
مارس 09, 2009 @ 00:52:00
ياااااااااااااااااه دا كلو
ياما كان نفسى اكون معاكم
ان شاء الله المره اللى جيه
والف مليون مبروك
وحشاااااااااااااااانى اوى وربنا
اموووووووووووووووووووووه
مارس 09, 2009 @ 01:21:00
مهما قولتي ومهما عدتي ومها اتكلمتي
عشان انتي حد جميل اوي,
بنحبك.اوي
مارس 09, 2009 @ 03:27:00
راندا
مش مستخسرة و لا حاجة يا حبيبتى
ليه شايفنها كدا ؟؟
دى لحظة مصارحة
كنت خايفة فى الاول
و دلوقتى مبقتش خايفة خلاص
بحبك قوى
حاجات جوايا
كويس يا سالى قوى … إنتى جبتى التسمية الصح
حالة تصالح و جميلة قوى كمان
كلامك محسسنى إن قرارى دا صح
ربنا يخليكى ليا
و بوسيلى دودو قوى
كيارا
متحرمشى منك يا حبيبتى
soooo
البركة فيك و فيكم كلكلم بعد ربنا يا سووو
التدوين بيأثر فى حياة الناس بجد
على اكتر من شكل و مستوى
متحرمشى من دعواتك يا أخى العزيز
خمسة فضفضة
فضفوضتى حبيبتى
و عليكم السلام يا ستى
الله يبارك فيكى و عقبااااااال
و كل سنة و إنتى طيبة و أيوه عاملة ريجيم أيش عرفك ؟!!
الفضفضة خلاض طلعت و منتظرة رأيك
gannah
الله يكرمك يا جنة
اتمنى اكون عند حسن ظنك
ترجعى بألف سلامة يا حبيبتى
عاشقة الرومانسية
و لاغيرة و لا حاجة مسيرنا نتقابل قريب إن شاء الله
انا ناوية على مشوار إسكندرية دا
وحشتنى بنت الإيه
و كمان عاوزة أشوفكم
و بلاش عاااااا عشان خاطرى
بت يا خيخة
متقلقيش يا حبيبتى
اللى كتبته مش عشان حد
دا عشانى و عشان يوسف أولاً
و إنتى مش من المخمومين يا حبيبتى
و الحمدلله على وجودك فى حياتى
بحبك و بوسس لشريف كتييييير
مارس 09, 2009 @ 03:38:00
صباح الصباح
أزيك يا محمد منورنى
و كتر ألف خيرك على رأيك
و مشاعرك الطيبة دى
dahlia
شكرى ليكى يا داليا يفوق أى وصف
إنتى اللى قلبك كبير و جميل
قوى
قوى
قوى
amr
أزيك يا عمرو
تصدق بالله …إنت و دكتور فانكى دخلتوا قلبى قوى
معرفشى ليه إرتحتالكم زى ما نكون عارفين بعض من زمان
خيخة عندها حق تشبه عليك قوى
ربنا يكرمك و مشكريييين على رأيك فينا
و سلامك ليويو هيوصل … بس أشوفه الاول
خالص تحياتى ليك
عبدالله
أهلا يا عزيزى
إنت غطسان في بقالك مدة
منور و الله
و مسيرك يوم ترجع بالسلامة و تحضر معانا الأيام دى
الله يبارك فى عمرك
و عقبالك يا رب
sherif
يا أستاذ شريف حضرتك بتغمرنى بعطفك و كرمك
و بتمنى لو كنت بستحق كل هذا المديح
بس دا لو ليه سبب فهيكون نبل اخلاق حضرتك و فروسيتك النادرة فى الزمن دا
ربنا يدى حضرتك الصحة و السعادة
و راحة البال
و تنور وسطنا دايما
سومة … مجنونة فى بلد عاقل
حمدلله على السلامة يا سوما
كل الكلام دا الواحد بس يرد عليه إزاى ؟؟
متقلقيش يا حبيبتى أنا فاهمة قصدك و معنديش أى مشكلة على فكرة فى إنى أعترف بالخطأ
كانت مشكلة زمان
و الحمدلله دلوقتى … لأ
خالص حبى ليكى يا اعقل من بلد بحاله
mohamed hamdy
اهلا و سهلاً بيك يا محمد
يا فندم ربنا يوفقك فى كل عمل بتقوم بيه
و ارجو متكونش متضايق منى
بس الحقيقة إنى مبحبش إن صورتى تطلع و لو ميزعجكش يا ريت تشيلها و يبقى كتر ألف خيرك
و شكرى الجزيل ليك
همس
إنت فين يا قمر …و عاملة إيه عندك
إنتى كمان وحشتينا و بنفتقدك قوى فى التجمعات دى
ملحوقة إن شاء الله قريب لما تنزلى فى الاجازة
بوسة و حضونة و خلى بالك من نفسك
سمكة واحده
طيب يا سموكتى
ادينى نزلت البوست الجديد
و هستنى رايك يا حبيبتى
خالص حبى ليكى